Accessibility links

дүшәмбе, 5 декабрь 2016, Казан вакыты 05:29

Xalıqara Xatın Qızlar könendä Amnesty İnternational xatın-qızlarğa qarata köç qullanuğa qarşı kampaniä başladı


Bügen xalıqara xatın-qızlar köne uñayınnan Amnesty İnternational isemle xalıqara xoquq oyışması xatın-qızlarğa qarşı köç qullanunı beterü kampaniäsen başlap cibärüe turında iğlan itte. Amnesty'nıñ general sekretare İrene Khan mondıy kampaniä başlatunı – köç qullanunıñ kiñ cäyelgän buluı belän añlattı: "İñ qurqınıç närsä şul ki – xatın-qızlarğa qarşı köç qullanu böten cirdä bar, bu küreneş sıynıf yä mädäniät, din yä belemgä bäyle tügel", dide Amnesty İnternational oyışmasınıñ general sekretare İrene Khan. Nobel tınıçlıq büläge iäse, çığışı belän İrannan bulğan Şirin Ebadi, İslam xökümätläre xatın-qızlar xoquqların xörmät itmi, şunnan çığıp demokratik qimmätlärdän dä yıraq tora, dip belderde. Keşe xoquqları aktivistı Şirin xanım bügen Genavada xalıqara xatın-qızlar köne uñayınnan uzğan çaralarda qatnaştı. Anıñ süzlärençä, xatın-qızlar xoquqları häm demokratiä – ber äyber, xatın-qızlar xoquqlarınıñ yaqlanuı ildäge ğömüm keşe xoquqları torışın kürsätä. Ğiraqta Bağdad şähärendä bügen berençe xatın-qızlar üzäge açıldı. Anda Ğiraq xatın-qızları östämä belem alaçaq, xoquq, medetsina häm finans yardäm sorap möräcäğät itä alaçaq. Fillipinnıñ xatın-qız prezidentı Gloria Arroyo, ir keşelärneñ xatınnarı häm balalarına qarşı köç qullanuı öçen qatıraq cäza bireläçäge turında färmanğa qul quydı. Tönyaq Korea xatın-qızlarnı kübräk bala tudırırğa häm ilneñ iqtisadın üsterü eşendä äwzem qatnaşırğa çaqırdı.

XS
SM
MD
LG