Accessibility links

якшәмбе, 11 декабрь 2016, Казан вакыты 01:16

Tatarstan Däwlät Şurasındağı här urın öçen urtaça 4 keşe köräşä


Saylawlarğa qädär 5 kön qaldı. Soñğı könnärdä 10 nämzät Tatarstan Däwlät Şurası saylawlarında qatnaşmawı xaqında iğlan itte. Üzäk saylaw komissiäse xäbär itkänçä, barlıq terkälgän nämzätlärneñ sanı 224 keşegä qädär kimede. Xäzer parlamenttağı 1 urın öçen urtaça 4 keşe köräşä, dip isäplänä. Rusiä Prezidentlığına nämzätlär sanı da 1 keşegä kimede. 8nçe mart könne Tatarstannıñ Üzäk saylaw komissiäsenä, İvan Rıbkinnıñ isemen byületennän alu turında, Mäskäwdän kürsätmä kilde. Böten respublika buylap eşläwçe erele-waqlı saylaw komissiäläre äğzälärenä tağın eş östälde. Alar töşep qalğan nämzätlärneñ isemnären küpsanlı byületennärdän sızıp taşlarğa tieş xäzer.

Firqälär isemlegendä ällä ni zur yañalıq bulmadı. Soñğı atnada berse dä saylaw aldı köräşennän töşep qalmadı. Mäskäwdä «Rodina» - «Watan» saylaw blogı tiräsendä üzgärtep qorular barğanda, Tatarstandağı «Watan» saylaw blogı isän-imin eşläwen däwam itte. Çönki Tatarstandağı bu saylaw blogınıñ, Rusiädäge şundıy uq isemdäge berläşmä belän çağıştırğanda, bötenläy başqa firqälär tarafınnan tözelgän buluı açıqlana. Ä «Rusiä regionnarı firqäse» Mäskäwdäge «Watan» blogına kersä dä, Tatarstandağı berläşmädä ul yuq. Şuña bu firqäneñ Tatarstan bülege ayırım isemlek belän saylawlarğa bara.

Saylawlarğa berniçä kön qala, säyäsi ügetläw sizärlek itep arttı. Televidenie häm radioda birelgän tüläwsez efir waqıtına tege yäki bu nämzätneñ ışanıçlı keşeläre kilmi qala ide, xäzer andıy säyäsi xatalar yasalmıy. Rusiä Prezidentı bulırğa telägän nämzätlär üzläre studiägä kilä almasa, tawışı yazılğan yazmalarnı cibärä, yäki här qaysınıñ ışanıçlı keşeläre daimi tele häm radio efirda çığışlar yasap tora.

Nämzärlär üzläre dä aktivlıq kürsätä. 8nçe mart bäyräme dä bıyıl säyäsi tösmer aldı. Xatın-qızlarnı barlıq säyäsi firqä yulbaşçıları, nämzätlärneñ kübese qotlap çıqtı. Televizorda da tege yäki bu nämzätneñ eşe turında mäğlümat yışraq çığa başladı. Qazan uramnarında nämzätlärneñ zur räsemnäre elenä bara, saylawçılarnıñ poçta tartmalarında da deputat bulırğa teläüçelärneñ möräcäğätläre tulıp yata.

Saylawlar, yäşlär küñel aça torğan urınnarğa da ütep kerde. Mäsälän ütkän yal könendä, «Yäşlär Berdämlege» digän oyışma, tönge klubta çibärlek bäygesen uzdırdı. İñ çibärlär arasında, iñ aqıllılarnı sayladılar, dip yazdı bu xaqta İntertat.ru agentlığı. Bäygeneñ axırğı sınawında, qızlarğa, Rusiä Prezidentı belän kötmägändä oçraşqan oçraqta, üzlären niçek totaçağın kürsätergä turı kilgän. Çibärlek bäygesenä bäyä birep utırğan «Berdäm Rusiä» firqäse äğzäläre, soñğı sınawnı uñışlı uzğan Svetlana Matveyevanı ««Yäşlär Berdämlege»neñ iñ çibär qızı» bäygesendä ciñüçe itep bilgeläde.

Bikä Timerova, Qazan

XS
SM
MD
LG