Qızğanıç, büläklänüçelär arasında tatar isem-familiäläre küzgä çalınmadı. Gubernatornıñ xäläl cefete Lyudmila Şamanova Qotqaruçı Xristos çirkäweneñ zur zalında “Olimpiä” isemle milli (natsional'nıy) büläkkä layık bulğan. Şulay itep, Valentina Matvienko, Ğalina Karelova, Alla Pugaçeva, Elina Bıystritskaya, Valentina Tereşqowa, Lyubov' Slisqa, Lyudmila Ğurçenqo, Sof'ya Rotaru, Ğalina Wowçek, İrina Rodnina kebek dönyaküläm tanılğan böek xatın-qızlar arasında general xatını bulıp qına tanılğan Lyudmila Şamanova yoldızı da balqi başladı. Büläk “Xäyriä eşçänlegen üsterügä häm millätneñ ruxi xaläten nığıtuğı zur öleş kertkäne öçen” birelgän. Üze oyıştırğan Xäyriä fondına qayan aqça aladır – bezgä qarañğı. Ä menä 8-mart aldınnan Ölkä Eçke eşlär idaräse başlığı general Waleri Luqin qulınnan “MVDnıñ 200 yıllığı” digän midal alğan tatar qızı Venera Latıypowanıñ batırlığı küplärne xäyran qaldırğan ide. Ul, üze turında uylamıyça, keşe üterüçene qoralsızlandıra häm avtobus şoferın qotqarıp qala.
Xatın-qızlar köne bäyräme “xalıqara” dip atalsa da, anı barı tik kommunistik ideologiädän arına almağan illär genä bäyräm itä. Şul isäptän, arınırğa omtıluçı Rusiä dä. Şul çanağa utırtılğan tatar da inde. Şulay uq bezneñ yäşlärgä tatar-möselman öçen bötenläy çit-yat İzge Valentina könen bäyräm itü çire dä yoğa başladı. Mäxäbbät digäne härwaqıt keşe küñelen bizägän kebek, xatın-qızlarğa da ixtiram daimi bulırğa tieş ikänen barıbız da belsäk tä.
Kem äytmeşli, här naçar närsäneñ yaxşı yağı bula. Bu bäyrämneñ dä inde. Milli mädäniätebezne beraz iskä töşerü öçen genä bulsa da.
Bäyräm könnäre aldınnan Ul'yan ölkäse Çardaqlı rayonı üzäge Mädäniät yortında Milli mädäniätlär festivale uzdı. Anda Tatar Qolmayırı, Papaw, Abdulla, Ürän, Yaña Qızılsu awılları üzeşçännäre qatnaştılar. Ölkä üzägennän tanılğan cırçılarıbız da qatnaştı.
İske Qulatqı rayonı üzägendä cıyılğan xatın-qızlar aktivın danlıqlı “Gölşayan” ansamble täbrikläde. Martnıñ 7 sendä Ölkä Tatar mädäni üzäge Qarsun rayonı Noğay ile awılında tamaşa qıldı. “Tuğan tel” oyışması idaräse äğzası Rozaliä Matrosova berniçä milli xäräkät aktivistı belän üzeneñ tuğan awılı Çınlı rayonı Käşä awılı xalqınıñ tantanasın bizäde.
Ölkä üzägeneñ Milli qul'uralarnı üsterü üzäge dip atalğan binada xatın-qızlar aktivı qatnaşlığında icadi kiçä uzdı. Cıyılğan xatın-qızlarğa şuşı bäyräm bik tä oşadı, çönki çäyläp utıru barışında millätebez yazmışına qağılışlı citdi söyläşü dä buldı.
Läkin teläklär dä bar. Küp yıllar Uqıtuçılarnıñ belemen qamilläşterü institutında metodist bulıp eşlägän milli xäräkät aktivistı Rawiä xanım Abdullina, mäsälän, mondıy çaralarnı kiñ külämdä matbuğat aşa iğlannar birep oyıştırırğa kiräk, dide. Ä bolay – älege dä bayağı ber ük xalıq barlıq çaralar da qatnaşa. Milli tärbiägä qağılışlı tirän eçtälekle çaralar zur zallarda küp xalıq qatnaşlığında uzarğa tieş. Ä çäyläp utıru öçen bar xalıqnı da cıyıp bulmıy. Yarıy, bu yulı xatın-qız aktivın çäyläp utıruğa cıyu aqlanadır da. Läkin Mädäni üzäk direktorı Gölsinä Gerasimowa, ğomumän, barlıq çaralarnı da şundıy ısul belän oyıştırırğa tırışуын qabul itü qıyın. Şunlıqtan Rawiä xanımnıñ süzlären iğtibarğa alu waqıtı da citkänder.
Azatlıq radiosı , Ayrat İbrahim, Sember, 8-mart.
