Accessibility links

дүшәмбе, 5 декабрь 2016, Казан вакыты 21:49

Yatıp qalğançı atıp qalıyqmı ällä...


Bötentatar ictimaği üzäge matbuğat oçraşuında Rusiä prezidentı häm Tatarstan parlamentı saylawlarına dürt kön qala tağın ber tapqır pozitsiäsen açıqlap, saylawlarğa mönäsäbäten belderde. İctimaği üzäk Rusiädä soñı yıllarda barğan tendensiälärgä:

Federal'' Şurada Rusiäneñ distälägän xalıqlarınıñ wäkilläre bulmawı, millätlär palatası bulmawı,

milli säyäsät ministrlığı beterelü,

däwlät byudjetınnan milli säyäsätne finanslawnı tuqtatu,

milli televizion häm radio tapşırularnı qısqartu,

millätlärneñ üz yazularına, ayırım alğanda latinğa küçüne tıyu kebek küreneşlärgä bäyä birep-“konstitutsion prinsiplardan äkrenläp häm qızulana bara torğan çigenü açıq sizelde”-digän näticä yasıy.

Ber özek. “Küptän küp xörmätle Rusiä Federatsiäse Prezidentı Vladimir Vladimiroviç Putin räxim itep Rusiäneñ küpmillätlege ul tarixi çınbarlıq häm bäyäläp betergesez, saqlana häm östälä torğan unikal'' ruxi-mädäni baylığı ikäneñ onıtmağız. Rusiä xalqın häm Rusiä xakimiäten küpmillätlelek ul Rusiäneñ bäläse dip, Rusiäne yañarışqa etärüçe köçlärne çeçen protsessı kebek qanlı qırılış yulınnan cibärergä tırışqan mäkerle kiñäşçeläre yanığızdan tup yädräse oçarlıq yıraqlıqta totığız.”

Ä inde parlament saylawlarına kilgändä, mäğlüm ki, Bötentatar ictimaği üzäge milli säyäsättä uñay pozitsiädä torğan firqa isemlegendä bulsa da Tatarstan Däwlät Şurasına ütärgä tırışa. Bu saylawlarda İctimaği Üzäk liderları “Российская коммунистическая рабочая партия-Российская партия коммунистов” isemleklärendä qatnaşa. Şuña kürä matbuğat oçraşuında älege firqa bülege citäkçese Rif Zarifullin, äxlaqi liderı dip täqdim itep itelgän Fändäs Safiullin. İsemlektä öçençe bulıp torğan sänäğätçe Mixail Kal''çev, mädäniät eşleklese Miñğol Galiev bar idelär. Forsattan faydalanıp Fändäs Safiullinğa Rusiä xakimiätendäge soñı üzgäreşlärgä mönäsäbäten beleştem. Ul Rusiä xökümätendä milli mäs''älälär öçen cawaplı ministr wazifası beterelü, xökümät apparatı citäkçese itep elek prezident apparatı citäkçeläreneñ berse bularaq respublikalar wäkälätlären çikläw buyınça bik qatı eş alıp barğan Dmitriy Kozak quyıluı, Rusiäneñ kiläçäktä federalizm yulında baruın şik astına quya dip sanıy.

Şulay itep milli xäräkät yatıp qalğançı atıp, bu saylawlarda millät öçen närsäder eşläp bulmasa hiç yuğında isän ikäneñ belderep, tawışın işetterergä niätli.

Yunıs Ätnäle

XS
SM
MD
LG