Rusiäneñ yaña xökümäte bilgelänüenä çärşämbe könne Tatarstanda da räsmi räweştä añlatmalar yañğıradı. Tatarstan prezidentı Mintimer Şäymiev Vladimir Putinnıñ xökümätne saylawlarğa qädär alıştıruı anıñ ikençe mötdätkä saylanaçağına inanuın häm kiräkmästän waqıtnı suzarğa telämäwen kürsätä, dide. Älege xökümät yaña prinsiplar buyınça bilgelängän, dimäk küçeş periodınıñ zur öleşe inde ütelgän häm bez yaña çorğa kerdek, digän süz. Bu byurokratik apparatnı beterü yulı, dip äytte ul. Şulay uq Mintimer Şäymiev xäzergä administrativ reforma federal’ däräcädä ütä, läkin töbäklärgä dä aña yaraqlaşırğa kiräk bulaçaq, xäyer, respublika xökümätendä bez älegä üzgäreşlär kertergä cıyınmıybız, dip tä östäde.
Läkin berençe bulıp älege waqiğağa reaksiäne vitse-premyer Zilä Wälieva belderde. Yaña ğasır telekompaniäseneñ VİP-zal tapşıruında sorawlarğa cawap birgändä, ul bu temanı da çitlätep uzmadı. Yaña xökümät bilgelänü respublika xakimiätendä ällä ni üzgäreşlärgä kitermäs, dide. Anıñ süzlärençä, Tatarstanda xökümätne reformalaw inde 2 yıl elek başlanğan. Qayber ministrlıqlarnı qısqartıp, qalğannarnıñ eşlären kamilläşterü bolay da bara ide, dide Zilä Wälieva. Şulay itep, Tatarstan bu eştä dä aldınğılardan bulıp, Rusiä citäkçelegenä ürnäk tä kürsätkän ikän äle.
Tatarstan prezidentı kiñäşçese Rafail Xäkimov ta säyäsi belgeç bularaq Azatlıq radiosı öçen yaña Rusiä xökümäte turında üzeneñ fikerlären belderde.
Tatarstan öçen älege xökümätneñ faydası yäki zıyanı turında äytergä äle awırraq. Anısın kürerbez. Läkin bu xökümätneñ uñay yaqları da bar. Berençedän, ul xäzer qısqardı. Min küptännän äytep kilä idem monıñ kiräklegen. Annarı, andağı keşelär tanış, alar sälätle, eşli alırlar dip uylıym
Bu Rafail Xäkimovnıñ fikerläre ide.
Gölnaz İlgizär
