Accessibility links

якшәмбе, 4 декабрь 2016, Казан вакыты 09:12

Matbuğat küzätüe


Çärşämbe, 10 mart könne dönya kürgän basmalardağı iñ qızıqlı materiallar xaqında söyläwne Watanım Tatarstan gäcitennän başlıybız. Anıñ bu sanınıñ berençe bitendä 9 mart könne Vasil’yevo şifaxanäsendä icat yortı açıluı turında yazma, Qazanda şuşı könnärdä genä tözelä başlağan Metro Cash&Carry kompaniäseneñ säwdä üzäge xaqında şähär xakimiäte başlığı Kamil İsxaqovnıñ kirpeç salıp töşkän räsemle mäqälä urın alğan. Şulay uq anda Nurixan ağa wasıyäte digän isem astında küptän tügel genä wafat bulğan yazuçı Nurixan Fättaxnıñ soñğı, yazılıp ta betmägän mäqäläse basılğan. Yazuçınıñ tormış iptäşe Rufinä xanım tanıştırğan älege yazma Bez yäşibez bäxet ilendä dip atala. Şulay uq Watanım Tatarstannıñ 10 mart sanında bu atnada uzaçaq saylawlarğa bağışlanğan yazmalar da şaqtıy. Mäqälälär nämzätlär turında söyli, alarnıñ qılğan äybät eşläre belän tanıştıra. Gäcittä Tatarstanda keşe xoquqları buyınça wäkilneñ 2003 yıldağı eşçänlege turında dä belep bula. Bu xaqtağı Räşid Wağizovnıñ notığında wäkilneñ eşçänlegeneñ töp yünäleşläre, grajdannarnıñ törle tarmaqtağı xoquq bozularğa qarata şikäyätläre turında täfsilläp yazıla.



Şähri Qazan gäcite isä üzeneñ 10 mart sanında iğtibarnı Qazannıñ yaqınlaşıp kilüçe meñyıllığına yünältä. Monda Rusiäneñ finans ministrı Aleksey Kudrin citäkçelegendä ütkän älege bäyrämgä äzerlek komissiäseneñ utırışı xaqında belep bula. Qazan turında tarixi mäğlümätlär alıp, şähärneñ istälekle urınnarı xaqında uqıp bula. Rafail Mostafin isä uquçılarnı şähärneñ meñyıllığına bağışlanıp bastırılğan Tarixi Qazan dip isemlängän fotoal’bom belän tanıştıra. XIX ğasırdan başlap XX ğasırğa qädär Qazanda turında dönya kürgän meñ yarımnan artıq otkrıtkanıñ küpçelege älege fotoal’bomda urın alğan. Anda alarğa tatar, rus häm ingliz tellärendä añlatmalat da basılğan. Annan tış gäcittä şähärneñ problemalarında qağılışlı yazmalar da urın alğan. Qazannıñ xakimiät başlığı urınbasarı Lenar Wäliev toraq xucalığı eşçänlege turında söyli, jurnalist Xatıyp Gäräy şähärneñ säwdä xezmätkärläre cıyılışı belän tanıştıra. Şulay uq Şähri Qazanda milli sport teması da yaqtırtıla. Bez köräşle xalıq dip isemlängän yaña ğına çıqqan kitap turında anı äzerläwçe jurnalist İldus İldarxanov söyli.



Gölnaz İlgizär

XS
SM
MD
LG