Accessibility links

сишәмбе, 6 декабрь 2016, Казан вакыты 17:10

Vladimir Putin Rusiäneñ yaña xökümäten dä üze öçen qorğanday tözede


Yäkşämbedä uzaçaq prezident saylawlarına Mäskäw Kremleneñ xäzerge xucası häm nämzätlär arasında töp däğwaçı Vladimir Putin yaña xökümät belän bara. Ul monı berniçä kön elek wäğdä itkän ide, sişämbedä isä Putin ministrlarnıñ isemlegen bäyän itte. Rusiä xökümäte elekkesenä qarağanda cıynağraq bulaçaq, anda yaña yözlär dä bar.

Xökümät qoru mäs''äläsendä prezident Vladimir Putin kötelmägän adımnarın däwam itep, aldağı 4 yılda üzeneñ kemnär belän eşlärgä cıyınuın belderde. Tağın 3 könnän soñ uzaçaq saylawlarda näq menä anıñ ciñäçägenä inde berkem dä şiklänmi kebek, şul isäptän ul uze dä. Putinneñ yaña xökümätne aldan uq, tawış birü könenä qädär iğlan itüe üze genä şul xaqta söyli. Konstitutsiädä qaralğança, Rusiä xökümäte prezident saylawlarınnan soñ urınınnan kitärgä tieş, läkin Putin inde berniçä märtäbä kiläçäktä näq menä şuşı kabinet belän eşlärgä cıyınuına işarä itte. Andağı üzgäreşlär, berençe çiratta xökümätneñ cıynaq buluı, azraq ministrlardan toruı Vladimir Putinneñ däwlät belän idarä itüne kamilläşterü, äwzemräk itü telägendä buluın kürsätä. Mixail Kasyanov xökümätendä barlığı 30 ministr bar ide, xäzer isä alar sanı 17-gä genä qaldırıla. Qayber ministrlıqlar bötenläy taratıla, ä kübese berläşterelä. İkençe ber möhim küzätü - älege xökümätne cämäğätçelekkä, mantiq taläp itkänçä, yaña premyer-ministr tügel, ä prezident üze täqdim itte. Bu da anıñ şuşı xökümät belän turıdan-turı üze eşlärgä cıyınuın añlata. Citmäsä, xökümätneñ eşlär idaräse citäkçese, yäğni premyer häm vitse-premyerdan qala anda öçençe keşe itep Putinneñ yaqın kiñäşçese Dmitri Kozak bilgelänä. Yañalıqlar ministrlar isemlegendä dä şaqtıy. Yaña yözlär arasında anda, elek Rusiäneñ Berläşkän Millätlärdäge daimi wäkile bulıp torğan Sergey Lavrovnı kürep bula. Ul Rusiäneñ tışqı eşlär ministrı itep bilgelänä, ä elekke ministr İgor İvanov ilneñ İminlek Şurasına cibärelä. Tışqı säyäsät citäkçelegenä Sergey Lavrovnıñ kilüe anda nindi dä bulsa üzgäreşlärgä kiteräçäkme, küzätüçelärdä şundıy soraw da tua. Mäskäwdäge säyäsi tikşerenülär üzägen citäklägän Sergey Markov, Lavrovnıñ ministr itep bilgelänüe Rusiä tışqı säyäsäten üzgärtmäs dip uylıy.

Audio, Sergey Markov

Markov fikerençä, tışqı eşlär ministrınıñ üzgärüe Rusiä tışqı säyäsäteneñ üzgärüenä kitermi, ber diplomat - Lavrov - ikençesen - İvanovnı - almaştıra. Bu Rusiä tışqı säyäsäteneñ barınnan bigräk prezident qulında qaluın añlata, dimäk ul prezident idaräsendä Putinneñ yaqın kiñäşçeläre tarafınnan bilgelänäçäk. Bu Mäskäwdäge säyäsi tikşerenülär üzägen citäklägän Sergey Markov süzläre ide. Ul şulay uq, "Lavrov ul diplomat, anıñ üz säyäsi qaraşları yuq, ul alarnı berqayçan da bäyän itmäde" di.

Audio, Sergey Markov

Şul närsäne, yäğni dilbegälärneñ prezident idaräse häm Putinğa yaqın keşelär qulında qaluın, yaña xökümättäge iqtisadi blokta da kürep bula. Finans, iqtisadi täräqqiat häm säwdä ministrları üzgärmi, alarnı elekkeçä Putin fikerdäşläre sanalğan liberallar Aleksey Kudrin häm German Gref citäkläyäçäk. Ä yaña qorılğan industriä wä energetika ministrlığı başına şulay uq liberal Viktor Xristenko quyıla. Mäskäwdäge ikençe ber säyäsi belgeç Aleksandr Konovalov xökümätneñ yaña qorılışı ömet uyatırlıq dip isäpli.

Audio, Aleksandr Konovalov

Xökümät eşen canlandırırğa tırışu maqsatın tağın şul da kürsätä - anda xäzer ber genä vitse-premyer bulaçaq häm ul urınğa inde iğlan itelgänçä, şulay uq liberal iqtisadçı Aleksandr Jukov bilgelänä. Häm nihayät tatar wä başqortlar iğtibarın cälep itärlek yañalıq bulıp Rusiäneñ eçke eşlär ministrı urınına Räşit Nurğalievne bilgeläw tora. Elekke xökümättä däwlät milke ministrı bulıp eşlägän Färit Ğäzizullinneñ ministrlığı bu yulı bötenläy telgä alınmıy, anıñ eşen Gref citäklägän iqtisadi täräqqiat wä säwdä ministrlığına yökläw küz aldında totıla.

Kärim Kamal, Praga
XS
SM
MD
LG