İke elekke Xorvatiä generalı 1995nçe yılda serblarğa qarşı çaraları öçen bügen Berläşkän Millätlär Oyışmasınıñ suğış cinäyätläre mäxkämäse aldına bastı. Mladen Markaç häm İvan Çermak tribunalğa üz teläge belän birelgän. Alarğa uzğan atnada 7 törle ğayepläw belderelde – alar arasında keşelärne ezärlekläw, küpläp üterü, urlaşu häm keşelärneñ milken tar-mar itü turındağıları da bar. İrtägä alar mäxkämä aldına basaçaq.
Bügen tribunal 1992-95nçe yıllarda Luka lagerendäge waxşileklär öçen cawaplı bulğan elekke Bosniä Serb politsiä xezmätkäre, 37 yäşlek Ranko Çesiç'nı 18 yıl törmä cäzasına xökem itte. Çesiç üz ğayeben tanıdı.
Xökem qararın uqıp birgän xakim Alphons Orie, Çesiç kimendä 10 totqınnı üterüdä häm ike ber tuğannı kimsetü öçen başqaları aldında ber berse belän censi mönäsäbätkä kerergä mäcbür itüdä ğayeplänä, dide. Ämma Çesiçnıñ üz ğayeben tanuı häm ükeneç belderüe – xökem cäzasın yomğartqan. Anı ğömerlek törmä cäzasına da xökem itü ixtimalı bulğan.
