Tizdän Başqortstan xalqı Almaniäneñ kiñ bilgele «Lufthansa» şirkäte oçqıçlarında räxätlänep oça başlayaçaq. Äle bu turıda Ufada söyläşülär bara. 12 mart könne Başqortstan başqalasına «Lufthansa» şirkäteneñ Qazaqstan, Qırğızstan häm Üzbäkstan respublklarındağı baş wäkile Dirk Grossman citäkçelegendäge delegasí kilde. Almaní wäkillege comğa könne Ufa xalıqara aeroportı citäkçelege belän söyläşülär ütkärde häm «Lufthansa» şirkäte bülege öçen anda bülmälär saylaw belän mäşğül buldı.
«Lufthansa» belän Başqortstan hawa yulları şirkäte arasındağı xezmättäşlek bu yılnıñ 1 mayınnan başlana. Näq şul könne «Lufthansa» şirkätenä qarağan 319 nçı şäkeldäge Fransiä aerobusı Ufadan täwge säyäxätçelärne Frankfurtqa alıp kitä. Annan soñ mondıy oçışlar atnasına öç tapqır bulaçaq. Baştağı aylarda, reklam çarası sıyfatında, «Lufthansa» Ufa – Frankfurt marşrutı biletı bäyäsen 399 AQŞ dolları külämendä totaçaq. Ufa aeroportı wäkilläre süzlärençä, bu summı Mäskäwdän şul uq Frankfurtqa oçqıç biletı bäyäseneñ yartısı ğına. Läkin monda şunısın da onıtmasqa kiräk, Mäskäwdäge tormış däräcäsen Ufanıqı belän hiç kenä dä çağıştırırlıq tügel. Anda bötenläy başqa töşençälär yassılığında yäşilär. Şulay da «Lyufthanza» şirkäteneñ Başqortstanda üz bülekçäsen açıp, atnasına öç tapqır oçışlar oyıştıra başlawı barıber istälekle waqiğa. Çönki moñarçı Almaniägä oçu öçen iñ elek Mäskäwgä barırğa kiräk ide. Ä Ufa belän Mäskäw arasındağı bilet bäyäläre dä xäzer bik teşläşä.
