Accessibility links

шимбә, 3 декабрь 2016, Казан вакыты 05:38

İspan räsmiläre Madrid xöcümnäre artında Äl-Qaidä toru ixtimalın belderä


İspaniädä bügen parlament saylawları ütä. Tawış birülär atnakiç könne 200 keşeneñ ğömeren özgän terror ğämälläre sürätendä bara. İspan räsmiläre başta şartlawlar öçen Basklarnıñ ETA törkemen ğäyeplägän ide. ETA üze xöcümnärgä qatışı buluın kire qağa. Bügen bu turıda Basklarnıñ "Gara" gäzite İnternet säxifäsendä qabat belderde.

Bügen irtän İspan räsmiläre ber video-tasma tabılu turında xäbär itte. Anda Äl-Qaidäneñ Yevropadağı wäkile şartlawlar öçen cawaplılıqnı üz östenä ala, dielä. Çüp sawıtında qaldırılğan tasma turında Telemadrid televideniesenä ğäräp aksentlı ber keşe şaltıratıp äytkän. Bu xaqta İspan eçke eşlär ministrı Angel Acebes xäbär itte:

Audio (Angel Acebes)

"Bu tasma 11 Mart Madrid xöcümnäre öçen cawaplılıqnı üzenä ala. Morocco aksentı bulğan keşe üzen Äl-Qaidäneñ Yevropadağı wäkile Äbü Ducan Äl-Äfğani dip tanıta. Älegä anıñ kemlege raslanmağan."

Acebes süzlärençä, bu keşe, 11 sintäber New York xöcümnärennän soñ näq 2-yıl yarım ütkäç yasalğan Madrid xöcümnären, Bush belän xezmättäşlek itkän İspaniägä cawap dip belderä. İspan räsmiläre xäzer bu tasmanı centekläp tikşerä. İspan Tışqı eşlär ministrı Ana Palacio BBC televideniesenä, ETA belän Äl-Qaidäneñ bergäläp eş itü ixtimalı tikşerelä dide. 11 Mart şartlawlarına bäyle räweştä ispannar 5 keşene qulğa aldı, şularnıñ 3-se Morocco, 2-se hind keşese. Morocco räsmiläre bu keşelärne tanısa da, alarnıñ islam oyışmaları belän bäyle bulun raslıy almadı.

Aldan ütkärelgän fiker beleşülärgä qarağanda bügenge saylawlarda xakimiättäge Xalıq partiäse ciñer dip kötelä ide. Ämmä soñğı waqiğalar xökümätneñ Ğiraq säyäsätenä qarata şiklärne köçäytte. Bilgele bulğança, İspan xökümäte Quşma Ştatlarnıñ terrorğa qarşı suğışın xuplap çıqtı. Xalıqnıñ 90 protsentı bu suğışqa qarşı ide. Uzğan töndä Madridta 7 meñ çaması keşe, demonstartsiä ütkärep, premier-ministr Jose Maria Aznar isemenä "Aznar – bu sineñ suğış, ä ülüçelär - bez" digän şiğärlär qıçqırdı.

Ali Gilmi, Praga
XS
SM
MD
LG