Accessibility links

җомга, 9 декабрь 2016, Казан вакыты 18:27

Tatarstan parlamentına ike säyäsi firqäneñ kerüe ixtimal.




14 martta Tatarstan deputatları, ber mandatlı okruglarda ğına tügel, berençe tapqır, firqä isemlekläre belän dä saylandı.



Belgänegezçä, xäzer parlamenttağı 50 urın säyäsi firqälär öçen birelsä, qalğan 50 urınnı, küpçelek tawış belän saylanğan, ayırım deputatlar alaçaq.



15 martta Üzäk saylaw komissiäse berençel näticälärne iğlan itte.

Tatarstanda 2 million 700 meñ saylawçı bar dip isäplänä. Alarnıñ 83,76% saylawlarda qatnaşqan. Barlıq okruglarda saylawlar ütte, dip sanala.



Älegä saylaw komissiäläre xezmätkärläre, Tatarstan parlamentın saylaw belän ber uq könne ütkän, Prezident saylawlarınıñ näticälären genä tögäl äytä ala. Firqälär öçen birelgän tawışlarnıñ kübese inde sanalsa da, äle küp urınnan kilgän mäğlümatlar isäpkä alınmağan.

Ä ber mandatlı okruglarda sanaw äle başlanğan ğına, şuña Üzäk saylaw komissiäse xezmätkärläre deputatlarnıñ isemnären düşämbe könne kiçkä genä iğlan itärgä wäğdä ittelär.



Üzäk saylaw komissiäse başlığı urınbasarı Minfaiq Wafin xäbär itkänçä, Tatarstanda, saylawlarda qatnaşqan saylawçılarnıñ 81, 61% Vladimir Putin öçen tawış birgän. İkençe urında - Nikolay Xaritonov bara, ul 6,64 % cia alğan. Ğomum Rusiä sannarı belän çağıştırğanda, Tatarstanda, 3nçe urında Sergey Glazyev tügel, ä İrina Xakamada bara. Anıñ öçen Tatarstandağı saylawçılarnıñ 3,09% tawışların birgän. Sergey Ğlazyevqa 2,40% saylawçı teläktäşlek beldergän.



15 martta 14.00 birelgän mäğlümatlarğa qarağanda, «Berdäm Rusiä» firqäse öçen – 69,96% birelgän. Kommunistlar firqäsen Tatarstanda 6,27% saylawçı yaqlağan. «Rusiä regionnarı firqäse»nä 3,55% tawış birelgän bulsa, «Tormış firqäse» 3,02% cia alğan.



Tatarstan däwlät Şurasında firqälärgä birelä torğan 50 urınnıñ kübesen «Berdäm Rusiä» firqäse alırğa tora. Bu xakimiät firqäsenä 47 urın tiäçäk, dip isäplänä. Kommunistlar firqäse, parlamentqa ütärgä mömkinlek birä torğan 7 % cia almasa da, saylaw qanunı, bu oçraqta da, kommunistlarğa berniçä urın birä ala. Bu xaqta saylaw qanunınıñ 59nçe matdäsendä süz bara. Anda äytelgänçä, saylawlarğa kilgän xalıqnıñ 50% artığı ber firqägä tawışların birgän bulsa, urınnar bülüdä iñ küp tawış ciyğan başqa firqä dä qatnaşa ala. Şulay itep, «Berdäm Rusiä»dän soñ iñ küp tawış ciyğan firqä, kommunistlar bulğanğa kürä, bu säyäsi köçneñ isemlegendä berençe 3 urında torğan Aleksandr Saliy, Robert Sadıyqov häm Näsimä Stolärova deputat kenägäsenä iä bulırğa mömkin. Şulay itep, Tatarstan parlamentındağı urınnarnı, iñ kimendä, 2 säyäsi köç alaçaq.



Xakimiätlär, ügetläw kampaniäsen alıp barğanda, keşelärne saylawlarğa kitertügä küp köç quydı. Qayber däwlät oyışmalarında, citäkçelär, üz xezmätkärlären, saylawlarda qatnaşıp qaytuı turında, xisap tapşırırğa mäcbür itte. Bu xaqta bezgä tıñlawıçlarıbız xäbär itte. Üz ara söyläşülärdä, saylawlarda qatnaşmaw faktı keşeneñ tormışına tä’sir tiärgä mömkin, digän süzne yış işetergä turı kilde. «Azatlıq» radiosı xäbärçese, tawış birüdä qatnaşmağan keşelärneñ isemleklären tözü mömkinlege belän qızıqsınğan ide. Bu sorawğa, Üzäk saylaw komissiäse räise urınbasarı Minfaiq Wafin qatğıy töstä: «Yuq!»,-dip cawap birde.



Bikä Timerova.

XS
SM
MD
LG