Accessibility links

пәнҗешәмбе, 8 декабрь 2016, Казан вакыты 08:55

Sember ölkäsendä saylawlar...


Sember ölkäsendä dä Vladimir Putinnıñ İlbaşı bulıp saylanuına şiklänüçe yuq ide – şulay buldı da. Läkin ölkädä üzençäleklär dä bar. İl buyınça Putin 70 protsenttan artıq cıysa, biredä 66 ğına. “Citmägän” tawışlar – kommunistik ideologiä yaqlılarğa birelgän. Nikolay Xaritonov Bötenrusiä belän çağıştırğanda ike märtäbä diärlek artıq tawış cıyğan. Sergey Glaz'yev ta 4,7 protsent belän il külämendägedän artıq ışanıç tapqan. Ä menä watandaşlar cämğiäte tözü öçen köräşkän İrina Xakamada nibarı 2 protsent saylawçılardan yaqlaw tapqan. Bu il buyınçağı sannan ike märtäbägä yaqın azraq. Qatnaşuçılar sanı buyınça Sember ölkäse kürşe respublikalardan küpkä qalışa – 61 protsent qına. Monı da äle, nigezdä, awıl xalqı tä'min itkän. Şähär xalqı isä bötenläy kirelände. Dekaberdä uzğan Däwlät Dumasına saylawlarda ölkä üzägendäge berdän-ber okrug buyınça deputat saylanmağan ide. Şulay uq Cirle parlamentqa (Qanunnar çığaru cıyılışına) 7 okrugnıñ 5ендә “Barısına da qarşılar firqäse” ciñep çıqqan ide. Bu yulı da şul 5 okrugnıñ bersendä genä deputat saylana aldı – şähärneñ elekke merı eşsez Sergey Yermakov eşle buldı, deputatlıqqa uzdı. Qalğan 4 okrugta xällär xarap. İñ küp tawış cıyuçılar da “qarşılardan” nıq qalışalar. 2 okrugta – 6шар, bersendä – 10, ä 11-nçe okrugta xätta 23,5 protsent “citmi”. Yuğisä, här okrug buyınça mämzätlär arasında Ölkä xakimiäte yaqlağan, yäğni Berdäm Rusiä firqäse wäkilläre bar ide. Alarğa da xalıq ışanmadı. Ä uñışqa ireşkän Sergey Yermakov bu firqa öçen – çit-yat keşe. Dimäk, Berdäm Rusiäne dä, ölkä xakimen dä ällä ni abruylı dip sanamıy şähär xalqı.

Tağın ber ğibrätle mizgel. Däwlät Dumasına cirle xakimiät Gennadi Savinovnı uzdıru öçen küp köç quydı. Eş uñmadı. Barısına da qarşılar 21 protsent täşkil itä. Savinov isä nibarı 11 protsent tawış cıyğan. Ä elekke gubernator Yuri Goryaçev annan 2 protsentqa kübräk yaqlaw tapqan. Monda tirän mäğnä dä çamalap bula: Şamanov xakimiätkä Yuri Goryaçevnı ciñep kilgän ide. Baqsañ, bügen Goryaçevnıñ abruyı Şamanovnıqınnan yuğarıraq. “Ülgän sıyır sötle bula” şul.

“Azatlıq” radiosı, Ayrat İbrahim, Sember.

XS
SM
MD
LG