Accessibility links

җомга, 9 декабрь 2016, Казан вакыты 06:59

Tatar yäşlärendä şayannar wä tapqırlar xäräkäte...


"Awlaq öy" ul şul yağı belän caylı, biredä härtörle temalarnı kütärep bula. Tatar yäşläre tormışımı ul, ällä inde çirattağı "Oscar"larnı birü tantanasımı, "Tatar cırı" yarışmasımı, yä bulmasa İtaliädäge San Remo cır festivaleme, bolarnıñ barısı xaqında da "Awlaq öy"dä söyläp bula. Häm inde söylände dä dip östärgä kiräk, min älege temalarnı elekke utırmalarıbızdan alğan idem.

Äytkändäy, San Remo turında süz çıqqan ikän, menä şuşı şimbädä genä anda bıyılğı tamaşa tämamlandı. Bu yulı italyan çırı festivale 54-nçı märtäbä uzdı häm anda 22 çırçı qatnaştı. Läkin, qäderle tıñlawçılar, bügen bez bu xaqta söylärgä cıyınmıybız. Tatarnıñ xäzer üz "Tatar cırı" yarışması bar häm bezneñ italyannarğa könläşep yatqan könnär inde artta qaldı. Alar äle haman da qatnaşuçılarğa "Altın Bars" xalıq premiäsen birmilär, ä menä tatarlar monı inde küptännän eşli. "Tatar cırı" ğomumän 10 yıldan artıq bara, yalğışmasam. Anıñ inde üz tarixı bar, ä menä bügenge "Awlaq öy"dä söylänäçäk tamaşa tatar arasında äle tuıp qına kilä diärgä bula. İnde tuğan bulsa da, härxäldä ayağına ğına basıp kilä dip äytik inde bulmasa. Süz tatar KVN-nı, yäğni urısçadan tärcemä itsäk, şayannar wä tapqırlar yarışı turında bulaçaq, qäderle duslar. Tapşırunıñ ikençe säxifäsendä dä bez şul kölke-kämit temasın däwam itep, Mäskäwdän alınğan yazmanı tıñlarbız. Ä tatar KVN-nı turında isä Qazannan Gölnaz İlgizär söylär.

Gölnaz İlgizär

Menä şulay itep qarşı aldı bualılar şayannar häm tapqırlar uyınnarınıñ festivalenä kilgän komandalarnı. Älege festival 2004 yılnıñ sezonın açu häm bıyılğı uyınnarda qatnaşapaq komandalarnı täqdir itü räweşendä ütte. Barısı Bua şähärendä küptän tügel uzğan bu festivalgä respublikanıñ 8 rayonınnan komandalar qatnaştı. Alar Quqmaradan Bondyug yoldızları, Çüpräledän Mişär berketläre, ... häm Buanıñ üzennän cıyılma komandalar ide. Älege yılnıñ sezon açılu tantanası Buada ütü oçraqlı tügel. Tatarça KVNnıñ 2003 yıl sezonında näq menä şuşı rayonnın cıyılma komandası ciñep çıqqan ide. Bu da ällä ni ğäcäp xäl tügel, cönki monda şayannar häm tapqırlar bäygesenä şaqtıy zur iğtibar birelä. Monda tatar telendä KVNnı inde 1994 yıldan birle uynıylar. Bu xaqta rayon xakimiäteneñ mädäniät bülege citäkçese Mödärris Ğafiätullin menä närsälär söyli.

AUDİO

Menä şulay itep, äkrenläp tatarnıñ şayannar häm tapqırlılar bäygese respublika külämenä çıqtı. Älbättä, komandalarnıñ yumor häm satira däräcäse bik yuğarı dip äytep bulmıy. Alay da tatar estradasınıñ qayber süz ostalarına KVNçılarda ürnäk alırğa da mömkin. Uyınçılar, ğädättägeçä, üzläreneñ, respublika tormışınıñ könüzägendä torğan problemalar, mäsälär xaqında şayarttılar. Şunlıqtan här kilgän komandanıñ çığışında yaqınlaşıp kilä torğan saylawlar, eş xaqın tülämäw, tatar awılınıñ yäşäw räweşe turında şayartular işetergä mömkin ide. Tanılğan tatar cırçıların kürsätüsez dä bulmıy qalmadı, älbättä. Xäyer, mineñ şayartular turında söylägänemne tıñlağançı, uyınçılarnıñ üzlären tıñlap qarağız äle.

AUDİO

Festivalnıñ barışın tatar satirik-yazuçılarınnan torğan jyuri qarap utırsa da, bu yulı komandalarnıñ çığışın alqışlar belän barı tik tamaşaçı ğına bäyäläde. Jyurinıñ eşe mart ayında başlanıp kitäçäk premyer-liga uyınnarında ğına başlanaçaq. 4şär komandadan torğan törkemnärneñ uyınnarı Buada häm Balıq Bistäsendä häm 30 martta ütäçäk. Şunısın da äytergä kiräk. Tatar KVNı bäygeseneñ töp oyıştıruçısı, döresräge, torğıziçısı – Tatarstan respublikasınıñ Mädäniät ministrlığı. Äydägez äle alarnıñ fikerlären dä tıñlap kitik. Mädäniät ministrı urınbasarı İlfaq İbrahimov şayannar häm tapıqrlılar uyınınıñ maqsatları turında söyli.

AUDİO

Sez Mädäniät ministrı urınbasarı İlfaq İbrahimovnı tıñladığız. Axırda, şunısın da äytep kitmiçä bumıy. Tatarstanda tatarça KVNnı moña qädär dä uynıylar ide, älbättä. Mäsälän, Çallıda tatar KVNnarı inde berniçä yıl uzıp kilä. Läkin alar Mädäniät ministrlığı oyıştırğan bäygelärdä qatnaşmıy. İlfak İbrahomiv monı bolay añlata. Alar oyıştırğan KVN ligası kübräk xalıq belän eşläw öçen awıl, rayon mädäniät yortları qarşında oyıştırılğan. Bez üzebezçä oyıştırdıq, di ul. Älege ike aradağı mönäsäbätlärne añlıysı ciñel tügel.

Tatar yäşläreneñ şayannar wä tapqırlar yarışına quşılu tırışlıqları turında Qazannan Gölnaz İlgizär söyläde. Ä xäzer, beryaqtan bötenläy başqa, ä ikençe yaqtan moña bäyle temağa, qäderle duslar. Ser tügel, KVN-nardağı şayartunıñ zähärlege turıdan-turı tormışıbızda oçrap torğan axmaq küreneşlärgä bäyle. Xalıq ğädättä alarğa qarşı, başqa çarası qalmağaç, kölep köräşä. Şayartular öçen azıqnı tormış üze birä şulay itep. Şöker, kämit Rusiä yaqlarında citärlek. Şularnıñ bersenä bu atnada eş belän yörgändä bezneñ Mäskäwdäge xäbärçebez Näzifä Kärimova tap bulğan. Xäzer süz aña...

Xäbär, Näzifä Kärimova

Bu Mäskäwdäge Cämiğ mäçete imamı Damir xäzrät ide, anıñ belän qayber möselman ruxaniläreneñ kieme turında Näzifä Kärimova söyläşte. Menä şulay, qäderle duslar, yulığızda berär şundıy mulla-mazar, bigräk tä Ufa möftiäte ähele oçrasa, anıñ kiemenä küz salığız äle, qaywaqıt alar çınnan da çama digän närsäne onıtıp cibärä.

Yarıy, xuş, bez utırmabıznıñ azağına yaqınlaştıq, häm anı berär küñelleräk närsä belän yabası ide inde. "Azatlıq" radiosı cırlar tapşıru belän şöğellänmi, şul isäptän "Awlaq öy" dä. Läkin min alay da xäzer, bar tıñlawçılarıbız öçen tanış keşe, Rimzil Wälievneñ näq menä bügen 55 yäşen bäyräm itüen äytep kitärgä telär idem. Ul üze tuğan könnärne yaratmıy, ämma şulay da 55 yıl şaqtıy zur ğömer häm Rimzil äfände oçrağında äle ul bay eçtälekle, millätkä küp fayda kitergän ğömer. "Awlaq öy", "Azatlıq"nıñ Praga xezmätkärläre belän bergä Rimzil äfändegä üz sälämnären cibärä..

Audio

Qaysı tawışnıñ kemneke buluın Rimzil äfände üze açıqlar, ä min inde sezneñ belän xäzergä xuşlaşam, qäderle duslar, isän-imin torığız, "Azatlıq"tan ayırılmağız, xatlar yazğalağız! Bezneñ adresnı sez www.azatliq.ru säxifäsendä taba alasız. Sezneñ belän Kärim Kamal buldı, saw bulığız!

Cır, "Başqortstan tatarları"

XS
SM
MD
LG