Accessibility links

пәнҗешәмбе, 8 декабрь 2016, Казан вакыты 01:24

Tatarstan Däwlät Şurasınıñ yaña çaqırılışı iskesennän närsä belän ayırılıp toraçaq?


Belgänegezçä, Tatarstan Däwlät şurasına firqä isemlege belän «Berdäm Rusiä» wäkilläre saylandı. Kommunistlar 7% tawış cia almasa da, Tatarstannıñ saylaw qanunı bu firqägä parlamentta ber niçä urınnı alırğa röxsät itä. 16 martta ber mandatlı okruglarda saylanğan deputatlarnıñ isemnäre dä iğlan itelde. Soñğı näticälär äle räsmi räweştä iğlan itelmäsä dä, Tatarstan parlamentınıñ yaña çaqırılışın küzallarğa bula inde.

50 ber mandatlı okrugta 39 keşe «Berdäm Rusiä» firqäsennän saylanğan. İñ küp tawışnı, 98,7%, Norlat saylaw okrugında Şamil Yahudin cıyğan. Mamadışta Tälğät Abdullin, Arçada Robert Musin öçen dä 90% artıq tawış birgän. Mondıy xäl awıllarda ğına bula disäk, yalğışabız. Qazanda, İbrahimov saylaw okrugında mäsälän, «Elekon» şirkäte başlığı Nikolay Kolesov öçen 87 % artığraq tawış birelgän. Qazanıñ Kirov rayonı kergän okrugta da, «Efir» telekompaniäse başlığı Andrey Grigoryev öçen 72 % tawış birelgän, Yarbuyı okrugında da şul uq xäl, anda şulay uq 72 % belän, transport oyışması citäkçese Asfan Ğällämov ütkän.

Ä menä Qazannan saylanğan, motorlar tözü şirkäte citäkçese urınbasarı Vladimir Kondratovqa, elekke deputat Aleksandr Ştaninğa, şulay uq transport oyışması başlığı Nail Sadrievqa awırraq turı kilgän. Alar barı 30% tiräse tawış belän genä ciñep çıqqan.

Saylawlarda ciñgän 50 keşeneñ 11-re xakimiät firqäsennän tügel, ä üz üzlären kürsätkän keşelär ide. Därwişlär bistäsendä İvan Graçevnı häm tağın ber niçä keşene uzıp, Gölnara Tabakçi ciñgän. Gvardeyskiy okrugınıñ saylawçıların Alfred İşkuvatov wäkillek itäçäk. Gabişevoda Aleksandr Ştanin ciñğän. Şulay uq, Yäşel Üzändä - Milli bank citäkçese Evgeniy Boğaçev, Säydäş okrugında - Sergey Oskolok, Älmättä - Foat Komarov, Qazanda, Gagarin bülgesendä - «Tatfondbank» citäkçese İldus Minğazetdinov saylanğan. Quqmarada Flüra Ziatdinova da deputat bulğan.

Şulay itep deputatlar arasında, ere şirkät citäkçeläre, bank başlıqları, elekke deputatlar saylanğan. Yäşlärdän 1-2 wäkil bulırğa mömkin, xatın-qız deputatlarnıñ sanı da 12gä citäçäk.

Firkälärdän, parlamentta «Berdäm Rusiä», kommunistlar firqäse bulırğa tieş. «Uñ köçlär berlege» firqäsennän çıqqan nämzätlär saylawda ütmäsä dä, bu firqä teläktäşlek kürsätkän şäxeslär saylandı. Mäsälän, Aleksandr Ştanin häm Andrey Grigoryev. Alar bälkem, kiläçäktä dä, uñ qaraşların saqlap qalır. Ber nindi firqälärgä kermägän möstäqil deputatlar da bar.

Şunı belän bergä aldağı parlamentta «Tatarstan - yaña ğasır» ictimaği xäräkäte maxsus deputat törkeme tözegän ide. Bu yulı da, deputatlar arasında älege xäräkätkä kergän şäxeslär bar.

Şulay itep, Tatarstan Däwlät Şurasınıñ yaña çaqırılışında törle säyäsi qaraşta toruçı keşelär eşlärgä tieş. Läkin, az sanlı oppozitsiägä, 88 keşedän torğan küpçelekneñ fikeren üzgärtergä awır bulırğa mömkin.

Bikä Timerova, Qazan

XS
SM
MD
LG