Accessibility links

җомга, 9 декабрь 2016, Казан вакыты 04:55

Qazannıñ meñyıllığına bağışlanğan kürgäzmä Mäskäwdä dä eşläyäçäk


Respublikada Qazannıñ meñyıllığına äzerlek däwam itä. Läkin bu yünäleştä eş şähärne maturlatu, yaña binalar tözü, tarixi häykällärne tözekländerü belän genä çiklänmi. Başqalanıñ yubileyı uñayınnan Tatarstannıñ baş arxiv idäräse tarafınnan Qazanğa – 1000 yıl dip isemlängän kürgäzmä äzerlänä. 17 mart könne älege kürgäzmä häm anı äzerläw eşläre xaqında jurnalistlarğa da söylädelär. Oçraşuda respublikanıñ Mädäniät ministrınıñ berençe urınbasarı Rafail Wäliev, Baş arxiv idäräse citäkçese Damir Şäräfetdinov, Qazan başlığı urınbasarı Älfiä Tutaeva, tarixçı, akademik İndus Tahirov qatnaştılar. Alar süzlärençä, Qazanğa – 1000 yıl digän kürgäzmä 24 mart könne Mäskäwdä açılaçaq. Ber ay däwamında ul federal arxivlarnıñ Kürgäzmälär zalında baraçaq. 26 maydan isä kürgäzmä üz eşen Qazanda däwam itäçäk. Qazan milli mädäniät üzägendä qazanlılar andağı qızıqlı tarixi eksponatlar belän 25 iyüngä qädär tanışa alaçaqlar. Şunısı qızıq, bu kürgäzmädä respublika muzeylarında ğına tügel, ä Mäskäw häm Peterburg şähärlärendä saqlanğan eksponatlar da kürsäteläçäk. Älege kürgäzmä häm anıñ ähämiäte turında tarixçı, akademik İndus Tahirov söyli.

Bu kürgäzmä – respublika häm federal arxiv idäräläreneñ berläşep eşläw näticäse. Monda iñ qızıqlı, siräk kürsätelä torğan materiallar cıyılğan. Anıñ ähämiäte berençe çiratta şunda – älege bay kürgäzmä belän tanışqannan soñ bar keşedä, tatar xalqı bik bay tarixlı, qızıqlı xalıq ikänenä inanaçaq. İkençedän, bez tatarlarnıñ üzlärenä dä alarnıñ böyeklegen isbatlarğa yärdäm itäbez

Qazanğa – 1000 yıl digän kürgäzmä xaqında sezgä tarixçı, akademik İndus Tahirov söyläde. Çärşämbe könne uzğan matbuğat oçraşuında şulay uq älege kürgäzmägä bağışlanğan bik bay eçtälekle häm matur itep näşer itelgän al’bomnı da täqdir itü buldı. Anda Qazan tarixına qağılışlı iñ qızıqlı muzey eksponatları, möhim tarixi dokumentlar xaqında süz bara.

Gölnaz İlgizär

XS
SM
MD
LG