Accessibility links

дүшәмбе, 5 декабрь 2016, Казан вакыты 07:41

Yaña parlamentta öç säyäsi firqä bulaçaq


17 martta Tatarstan Parlamentı räise Färit Möxämmätşin jurnalistlar belän oçraştı. «Tatarstan parlamentında milli häm gender yaqtan tigezlekne saqlarğa tırıştıq», dide Färit Möxämmätşin. Parlamentnıñ 100 deputatı arasında 52 tatar, 36 urıs, 12 başqa millättän bulaçaq. Xatın-qızlarnıñ sanı 13 keşegä citäçäk.



Färit Möxämmätşinnıñ äytüenä qarağanda, Däwlät Şurasında 3 firqä bulırğa tieş. Berençe 2 firqäneñ isemnäre inde küptän bilgele bulsa, öçençese «Xalıq partiäse» bulıp çıqtı. Flürä Ziatdinova saylawlarda üz üzen kürsätkän nämzät bularaq ciñsä dä, Däwlät Şurasında şul «Xalıq partiäse» isemennän eşläyäçäk ikän.



Dimäk «Berdäm Rusiä» firqäsennän 87 keşe bulsa, kommunistlarğa 4 urın bireler, 1 keşe «Xalıq firqäse»en wäkillek itsä, qalğan 8-se - bäysez deputat bularaq eşlär, dip farazlana.



Saylawlarda ciñğäç, «Berdäm Rusiä» firqäse parlamenttağı töp komitetlarnı alırğa tora, bu xaqta Färit Möxämmätşin äytte.



Şuşı comğa könne, elleke parlamentnıñ Prezidumı utırışı bulaçaq häm anda, yaña Däwlät Şurasınıñ berençe sessiä könne bilgelänäçäk. Färit Möxämmätşin, ul 26 martta bulır dip planlaştırabız, dide.

Parlamentta 7 komitet bulaçaq, ber räis, berniçä urınbasar. Tağın, parlament kontrole komitetı eşlär, dip uylanıla. Şuña östäp, rus häm tatar tellärendäge qanunnarnıñ ber-bersenä täñgällegen tikşerüçe komissiä dä barlıqqa kilergä tieş.



Parlamentta daimi räweştä 20 keşe eşliyäçäk, qalğan 80 deputat, 2 urında da utıra ala. Ämma alar başqarma xakimiät häm xökem sistemasında eşlägän bulsalar, başqa wazifağa küçärgä tieş ikän. Mäsälän, Federal iminlek xezmäteneñ Tatarstan idäräse başlığı Aleksandr Gusev mäsälän, üz wazifasın deputatlıqqa alıştıraçaq. Ä menä xakimiät firqäseneñ isemlegendä ikençe urında bulğan hönär berlekläre federatsiäse başlığı Tatyana Vodopyanova deputat bulsa da, eş urının taşlarğa cienmıy.



Färit Möxämmätşin şulay uq, saylawlarda 7% tawış cia almağan firqälärgä dä mönäsäbäten belderde. Uñ köçlärgä häm «Rusiä regionnarı firqäse»nä oyışqanlıq häm waqıt citmäde, dide ul. Ä menä «Tormış firqäse» aktiv eşläsä dä, Duma saylawları belän çağıştırğanda, tarafdarlar sanın kimetkän. Färit Möxämmätşin Tatarstan Prezidentı kebek uq, bu firqäne yaratıp betermägänen yäşermäde, xätta Sergey Mironov wazifasınnan kitärgä tieş, digän belderü dä yasadı.



Bikä Timerova.

XS
SM
MD
LG