Accessibility links

җомга, 9 декабрь 2016, Казан вакыты 22:24

Tatarstan tarixın öyränü däwam itä


Xäzer kitaplar häm däresleklär şaqtıy küp näşer itelä, şul isäptän Tatarstanda da. Läkin 17 mart könne mäğärif xezmätkärläreneñ belemen kütärü institutında täqdir itelgän tarix däreslege bik üzençälekle. Ul Tatarstannıñ 20 ğasırdağı yäşäyeşenä bağışlanğan. Kitapnıñ avtorı – älege institutnıñ pedagogik kul’turologiä kafedrası professorı, tarix fännäre kandidatı Bulat Soltanbekov. Bulat äfände Tatarstanda tatar tarixına yañaça qaraşı belän bilgele ğalim, anıñ ezlänüläre häm kitapları da şaqtıy. Şul isäptän, tatar tarixına bağışlanğan uqu äsbapları, tatar telendä Tatarstan atlası, uqıtuçılar öçen küpsanlı cıyıntıqlar. Alar buyınça inde berniçä buın tarixçılar äzerlänä. Yaña täqdim itelgän ike tomlıq kitap ta şularnıñ räten tulılandırdı. Ul tarix uqıtuçıların äzerläwçe yuğarı uqu yortları öçen yazılğan. Xäyer, Tatarstan, XX vek: liçnosti, sobıtiya, dokumentı, yäğni Tatarstan XX ğasırda: şäxeslär, waqiğalar, dokumentlar dip isemlängän bu kitap tarixçılar yäki uquçı-uqıtuçılar öçen genä tügel, ä respublikanıñ XX ğasırdağı tarixı belän barlıq qızıqsınuçılar öçen dä mawıqtırğıç bulır. Çönki däreslek ğalimneñ berniçä yıllıq tirän ezlänüläre, törle arxivlarda eşläw näticäse. Anda bik küp häm bay mäğlümät tuplanğan. Şunısın da äytergä kiräk, älege ike tomlıq kitap tatar häm rus tellärendä basılğan. Bulat äfände süzlärenä qarağanda, kitapnı yazğanda ul tarixta bernindi dä kiräkmägän bitlär yuq digän fikerdän çığıp eşlägän.

Kitapnı täqdir itü çarasına qunaqlar da bik küp kilgän ide. Monda Bulat äfändeneñ dusları, kollegaları, xezmättäşläre qatnaştı. Alar arasında ğalim, akademik İndus Tahirov, Tatarstan Fännär akademiäseneñ prezidentı Mansur Xasanov, respublikanıñ Mäğärif ministrlığı wäkilläre da bar ide. Çarada çığış yasawçılar ğalimneñ tarix fänenä kertkän zur öleşen, anıñ qızıqlı häm eçtälekle kitapların bilgeläp üttelär. Bulat Soltanbekovnı berqayçan da döreslektän qurıqmıy torğan ğalim dip, ä anıñ xezmäten – respublikanıñ XX ğasırdağı yılyazması dip bilgelädelär.

Gölnaz İlgizär

XS
SM
MD
LG