Accessibility links

шимбә, 10 декабрь 2016, Казан вакыты 15:48

Analar bäygese xäyriä fondına yärdäm kürsäter


21nçe fevral'dä Qazanda bik üzençälekle “Neçkäbil” dip atalğan maturlıq bäygesendä 300läp äni qatnaşqan ide. Äye bu konkursta matur yözle häm zifa buylı bulu ğına citmi. İñ möhim şart ana bulu. “Tatarstan xatın-qızları” respublika cämäğät oyışması yärdämendä ütkärelgän bu bäygedä fän, käsep, muzıka kebek hönär belän şöğellänüçe, nigezdä zıyalı analar kübräk qatnaştı. Häm 45 yäşkä qädär bulğan çibär, uñğan analar arasınnan 12se genä finalğa çığu bäxetenä ireşkän ide.
17nçe martta “Piramida” mädäni- küñel açu üzägendä bäygeneñ finalı häm iñ matur anağa “Altın Neçkäbil” isemen birü tantanası buldı. Bäygeneñ finalı çın bäyrämgä oxşap tordı. 12 ananıñ barısı da bik matur ide. Piramida şığrım tulı buldı, här ananıñ “üz tawış birüçese” kilgän ide. Jyurida respublika ministrlığınnan El'vira Mavrina, yäşlär eşläre häm sport ministrı urınbasarı Andrey Kondrat'yev ta qatnaştı.
Berençe bulıp analar turında, alarnıñ ğailäse, eşe, ğomumän yäşäyeşläre turında wideoroliklar täqdim itelde. Üzläreneñ ostalığın, uñğanlığın analar sänğat'le itep şığır uqıp, cır-biyu başqarıp häm törle modalar kürsättelär. Ayıruça G.Qamal teatrı artistı bulğan Şamil' Barievnıñ qızın Aygöl Barievanı tatarça cırı belän xalıq bik yaqın qabul itte.
Analarğa ruxi yärdäm itär öçen irläre zalda tamaşaçı bulıp yanıp-köep utırsalar, ä balaları inde üzläre dä qatnaştılar. Böten Russiä xalıqara konkursı laureatı bulğan Aida Ğarifullina häm “Sozvezdie” dip isemlängän respublika konkursnıñ laureatı Vagapova Dilärä söykemle analarına bulışır öçen cırlar büläk ittelär. Ä keçkenä balalar şulay uq anaların söyenderer, ruxlandırır öçen säxnägä çığıp analarnı qoçaqlap aldılar. Säxnä ığı-zığı kilä ide, çönki qayber analarnıñ xätta öçär-dürtär balası bar häm keçkenä balalarğa säxnä şulqädär oxşadı, alarnı cıyıp beterü dä şaqtıy qıyın ide. Analarnı därtländerü öçen anda Qazannıñ KVN komandası “Dürt tatar”, “Färidä-Alsu” duetı da qatnaşqan ide.
Yarışnıñ axırında inde analarğa “Matur Neçkäbil”, “Nazlı Neçkäbil”, Uñğan Neçkäbil” kebek isemnär birelde. Konkursnıñ oyıştıru komitetı, sponsorlar, qunaqlar isemennän qotlaw süzläre citkerelde. Analarğa diplomnar, kosmetika häm çäçkälär dä birelde. Äytergä kiräk bu bik möhim konkurs buldı, çönki anıñ nigezendä xäyriä häm ictimaği programmalar da bar.
Yarışnıñ iñ dulqınlandırğıç waqıtı käsep ölkäsendä eşläwçe häm ike yäşlek İrekneñ anası Sağıydullina El'virağa “Altın Neçkäbil” isemen birü belän bäyle buldı. Bäygedä ciñüçe xäyriä fondın citäklärgä tieş bula, şuñadır xäyriä eşlär belän şöğellängän El'vira Sägıydullinaga “Altın Neçkäbil” isemen jyuri ber tawıştan birde. Ä “Almaz-xolding” şirkäte El'vira xanımnı küz yäşlärenä qädär dulqınlandırğan brilliant alqalar belän büläkläde.
Al'bina Zäynulla, Qazan.

XS
SM
MD
LG