Çeçnyanıñ Eçke eşlär ministrı Alu Alxanov, respublikada keşe urlawlarnıñ kübese öçen xoquq saqlaw oyışmaları cawaplı dide. Bu süzlären ul bügen ütkän xökümät utırışında äytte. Çeçnya prezidentı Äxmät Qadırov süzlärençä, soñğı berniçä yıl eçendä Çeçnyada 3 meñ keşe yuqqa çıqqan. Eçke eşlär Ministrlığı mäglümätenä qarağanda şuşı yılnıñ 2 ayında ğına 69 keşe urlanğan. Rusiäneñ keşe xoquqların yaqlawçı Memorial törkeme belderünçä, uzğan yılda Çeçnyada 480 keşe urlanğan. Memorial bolarnıñ kübese öçen Rusiä xärbilären häm Qadırovnıñ iminlek köçlären ğäyepli.
