Accessibility links

пәнҗешәмбе, 8 декабрь 2016, Казан вакыты 05:22

Tatar oyışmaları zur cıyınğa äzerlänä


Başqortstan tatar milli oyışmalarınıñ kileşterü şurası comğa könne üzeneñ çirattağı utırışın ütkärde. Nigezdä, Ufadağı milli oyışmalar citäkçeläre qatnaşqan bu utırışta yaqın könnärdä oyıştırılaçaq çaralar xaqında fiker alışular buldı.

Mäğlüm buluınça, 21 mart, yäkşämbe könne Ufada Näwrüz bäyräme ütkärelä. Soñğı yıllarda daimi oyıştırıluçı bu tantanalar bıyıl da başqalanıñ Salawat Yulayev isemendäge mäydanında uza. Anda respublikada yäşäwçe cide törki xalıqnıñ ictimaği – milli oyışmaları qatnaşa. Alar bäyrämgä kilüçelärgä härberse ayırım – ayırım üzläreneñ mädäni programnarın täqdim itäçäk.

Bäyrämgä, här yıldağıça, tatar milli oyışmaları da zur program äzerli. Anda Ufa «Nur» tatar däwlät drama teatrı artistları häm populár tatar cırçıları qatnaşaçaq. Näwrüz bäyräme qısalarında qul eşlärennän kürgäzmä eşli häm biregä kilüçelärne tatar milli aşları belän sílaw da oyıştırıla. Şuşı bäyrämne matur itep ütkärü mäsäläläre buyınça tatar milli oyışmaları kileşterü şurası äğzaları üz täqdimnären dä äytte.

Utırışta şulay uq kiläse atna azağında, atap äytkändä, 27 martta Ufada ütäçäk zur cıyını xaqında da söyläşü buldı. Kiläse atnanıñ şimbäsendä Başqortstan tatar milli oyışmaları berlege citäkçeläre häm milli xäräkätneñ aktiv äğzaları Ufada çirattağı kiñäytelgän utırışın ütkäräçäk. Anıñ kön tärtibenä ağımdağı mäsälälär belän berrättän, Başqortstanda tatar telenä däwlät tele statusın aluğa ireşü yünäleşendäge arıtabanğı burıç – xästärleklärne dä tikşerü kertelgän. Kileşterü şurası utırışında äytelüençä, tögäl ber atnadan ütäçäk söyläşüdä qatnaşu öçen Qazannan da wäkillär kiläçäk. Respublika citäkçelege haman da tatar telenä status birü mäsäläsendä üzeneñ açıq qına fikeren bäyän itmi. Tatar milli oyışmalarınıñ bu mäsälädäge yazma möräcäğätläre, xatları da cawapsız qala. Bu xäl Başqortstan Tatar kongressı Başqarma komitetı äğzaların häm başqa tatar milli oyışmaları citäkçelären aptıraşta qaldırdı. Kiläse atnada bu täñgäldä tağın nindi adımnar yasaw turında citdi söyläşü bulır dip kötelä.

Utırışta qatnaşuçılar böyek şağirebez Ğabdulla Tuqaynıñ tuğan könen Ufada zurlap bilgeläw mäsäläläre buyınça da fiker alıştılar. Älege mädäni çaranı ütkärügä bıyıl republík xökümäte dä beraz finans yärdäm bülgän. Ämma ul ğına citmäyäçäk ikän, şuña kürä başqa çığanaqlardan da aqça tabu zarurlığı äytelde. Şulay itep, kiläse atna azağında Ufada tatar milli oyışmaları wäkilläre tağın üzläreneñ ğädätkä kergän zur söyläşüenä cíıla. Anda qaralaçaq hämmä mäsälälärne dä cıyınnı oyıştıruçılar älegä açıp betmi. Kötelüençä, ul bik eşlekle şartlarda ütärgä tieş. Çönki moñarçı tıynaqlıq kürsätep kenä yasalğan möräcäğätlärgä Başqortstan xakimiatlarınıñ ise dä kitmäde.

Tatarstannıñ Başqortstandağı Säwdä – iqtisadi wäkilçelege citäkçese, Başqortstan Tatar kongressı Başqarma komitetı räise urınbasarı Ramil Bignov süzlärenä qarağanda, tatar telenä däwlät tele statusı taläp itü buyınça möräcäğätlär, xatlar qabul itü çorı ütte, xäzer tatar milli oyışmaları qatğiraq çaralar etabına küçäçäk. Bu çaralarnıñ nidän ğibarät buluı xaqında süz, bälki kiläse atnadağı cıyında da quzğatılır.

Fänis Fätxi, Ufa

XS
SM
MD
LG