Accessibility links

шимбә, 10 декабрь 2016, Казан вакыты 15:39

Köndälek matbuğat küzätüe


Watanım Tatarstannıñ 19 mart sanında uquçılar respublika Däwlät Şurasında saylanğan deputatlarnıñ tulı isemlege belän tanışa ala. Monda Berdäm Rusiä firkäsennän 46, Rusiäneñ Kommunistlar firkäsennän 4 häm ber mandatlı okruglardan saylanğan 50 deputatnıñ isemnär urın alğan. Şulay uq gäcit Färit Möxämmätşin yasağan ber şaqtıy qıyu belderüne dä ireşterä. Anıñ fikerençä, Sergey Mironov häm ul citäklägän firkä ütkän saylawlarda uñışsızlıqqa oçraw säbäple, Mironov firkä räislegennän genä tügel, ä Rusiäneñ Federatsiä Şurası räislegennän dä kitärgä tieş. Watanım Tatarstanda başqa qızıqlı yazmalar da şaqtıy. Mäsälän, tarixçı Nurulla Ğärifneñ Tatar mirası ker qulında digän yazması. Anda avtor bähäse bulmağan tatar tarixına qağılışlı mirasnıñ yazmışı turında, bügengä köndä älege yadkärlärneñ tieşleçä saqlanmağanı belän borçılu belderä. Ä İlyas Salixcan isä, ğalim Fayaz Xucin belän äñgämä qora. Anda tarixçı meñyıllıq Qazan xaqındağı tögälsezlek, yalğış fikerlärne döresli. Şähri Qazan gäcite üzeneñ comğa sanında uquçılarğa Tübän Kama drama teatrı belän tanışırğa täqdim itä. Teatr häm anıñ artistları turında teatr belgeçe Daniä Ğimranova yaza. Miläwşä Nizametdinova isä yazuçı Şärif Kamalnıñ tuuına 120 yıl tulu uñayınnan ütkärelgän çaralar turında yaza. Mädäni comğanıñ çirattağı sanı professor Nurmöxämmät Xisamovnıñ fikerläre belän başlanıp kitä. Anda ğalim Yaña ğasır telekanalında uzğan Tügäräk östäl söyläşüe uñayınnan tatar milläteneñ tele, mäğärife häm sänğäteneñ torışı xaqında uylanıp, alarnıñ ayanıç xälenä kem ğäyeple digän soraw quya. Häm üze ük şul sorawğa cawap birep, milli tärbiä ğailädä birelergä tieş, milli rux, tel kemnärneñder tırışlığına salınmıyça, här şäxesneñ can ixtiacı bulırğa tieş, dip yaza Nurmöxämmät Xisamov. Tatar milläteneñ yazmışı xaqında süz Bötendönya tatar kongressı citäkçese Rinat Zakirov belän uzdırılğan äñgämädä dä bara. Anda Rinat äfände şulay uq kongressnıñ Başqarma komitetı alıp barğan eşçänlek turında da söyli. 15 martta basılğan Mädäni comğa şulay uq uquçılarnı bilgele yazuçı Waxit İmamov belän tanıştıra. Ul – yazar öçen yäşi dip isemlängän mäqälädä Waxit äfändeneñ üze häm icatı xaqında Marsel Ğäliev yaza.

Gölnaz İlgizär

XS
SM
MD
LG