Accessibility links

Кайнар хәбәр

Putin: Kosovoda "etnik çistartular" bara


Rusiä prezidentı Vladimir Putin Kosovodağı soñğı köç qullanunı kisken täñqitläp çıqtı häm bu waqiğalärne "etnik çistartular" dip atadı. Putin süzlärençä, Rusiä Kosovodağı xällärgä bitaraf qala almıy. Anda çärşämbedän birle albannar belän serblar arasında bulğan bäreleşlärdä kimendä 30 keşe hälak buldı, berniçä yöz keşe cärähätlär aldı. Putin Könbatış xökümätlärgä häm töbäktäge NATO citäkçelegendäge totrıqlandıru köçlärenä möräcäğät itep – Kosovodağı serb azçığılığın yaqlar öçen tiz arada näticäle adımnar yasarğa çaqırdı. Putin şulay uq Rusiäneñ Ğadättäntış Xällär ministrı Sergei Şoyguğa Serbiä häm Çernogoriägä barıp serb qaçaqlarına yardäm itergä quştı. Kosovo premyer-ministrı Bajram Recepi serblarnıñ yuq itelgän milken yañadan buldıru öçen maxsus fond açılağaçağın iğlan itte. Kosovo prezidentı İbrahim Rugova, xalıqara cämäğätçelektän östämä yardäm soradı: " Tınıç xalıqqa häm xalıqara xärbilärgä höcüm itü – qabul itelerlek äyber tügel häm Kosovo mänfäğätlärenä turı kilmi. Böten bu waqiğalärgä bez kisken täñqit belderäbez", dide İbrahim Rugova.

Kosovoğa bügen Germaniäneñ 2 meñ keşelek xärbi köçläre kilde, alar töbäktä urnaşqan 18 meñ NATO ğaskärienä töbäktä totrıqlılıq urnaştırırğa yardäm itäçäk. Bügen Kosovoda köç qullanu oçraqları bulmadı, dip xäbär itelä.
XS
SM
MD
LG