Accessibility links

чәршәмбе, 7 декабрь 2016, Казан вакыты 11:37

Äfğanstan, İran, Üzäk Aziä häm Yaqın Könçığışta Näürüz bäyräme bilgelänä


Äle berniçä yıl elek uramnarğa çığıp biü, yaña yılnıñ kilüen bilgeläwne Äfğanstanda Taliban çorında küz aldına da kiterep bulmıy ide... İslam dinenä qadär barlıqqa kilgän Näürüz bäyräme Äfğanstanda bötenläy tıyılğan ide. Bügen Äfğan prezidentı Hamid Qarzai, Näürüzgä bağışlap – başqala Qabul tiräsendä meñlägän ağaç utırtu proyektın iğlan itte. Yaz başın bilgelägän bu bäyrämne Mazar-i-Şärif şähärendä 10 meñgä yaqın keşe bilgeli. Näürüz bäyrämen şulay uq Üzäk Aziä, İran häm Yaqın Könçığıştağı qayber xalıqlar bilgeli. Äfğanstanda kiçä açıq hawada bulğan zur tamaşanı qararğa meñlägän keşe cıyılğan ide. İranda prezident Möhammäd Khattami häm ilneñ yuğarı ruxi citäkçese ayatollah Ali Khamenei ikese dä däwlät televideniäse aşa xalıqnı bäyräm belän qotladı. Khatami, tüzemlelek – ekstremismnı, yaxşılıq – köç qullanunı ciñsen, dide. Prezident şulay uq berlektä İrannıñ eçke häm tışqı problemaların çişergä ömet belderde. Ayatolla Ali Khamenei, Amerika Quşma Ştatları İslam respublikasın cimerä almadı, dip uzğan cäydäge studentlarnıñ protest çaraların häm Amerikanıñ İrannıñ atom programmasına basım yasağanın iskä aldı. Ber genä ildä bügen Näürüz bilgelänmi, anıñ urnına mätäm köne iğlan itelgän. Süriädä Körd yulbaşçıları biredä yäşägän million yarımlıq körd xalqın, soñğı 6 köndä politsiä belän ğaräplär arasında bulğan bäreleşlärdä hälak bulğan ike distädän artıq keşene iskä alırğa çaqırdı. Häm äle genä kilep citkän iñ soñğı xäbär – Äfğanstannıñ mäğlümat agentlıqları belderüençä Mazar-e-Şarif şähärendä kiçä başlanğan Näürüz çaralarında kimendä 4 keşe taptalıp ülgän, 80nnän artığı cärähätlär alğan.

XS
SM
MD
LG