Accessibility links

җомга, 9 декабрь 2016, Казан вакыты 01:13

Mäğärif ministrlığı uquçılarnı sälämätländerä


Ser tügel, xäzerge zamanda yıldan-yıl balalarnıñ sälämätlege naçarlana ğına bara. Bu bigräk tä mäktäp yäşendäge balalarğa qağıla. Tatarstandağı balalar da çığarma tügel. Kollegiädä çığış yasağan Sälämätlek saqlaw ministrı wäkile süzlärenä qarağanda, respublikada nibarı 6 protsent qına sälämät bala tua. Ä mäktäpkä kergäç alarnıñ sanı tağın da kimi. Şuşı ayanıç xälne istä totıp, Tatarstannıñ Mäğärif ministrlığı da älege problemağa bitaraf qalmadı. 5 yıl elek Mäğärif ministrı Farız Xarisov niäte belän respublikada Mäğärif häm uquçılarnıñ sälämätlege dip isemlängän komplekslı programma eşli başladı. Şulay itep, balalarnıñ sälämätlegen nığıtu östendä ayırım mäktäplär yäki uqıtuçılar ğına, ä respublikanıñ mäğärif tarmağı tulayım eşli başladı. Kollegiädä ministrlıqnıñ belgeçe Älfiä Urmançeeva şuşı xaqta çığış yasadı. Häm Tatarstan mäktäplärendä uquçılarnıñ sälämätlegeneñ torışı, anı saqlaw, üsterü xaqında söyläde. Anıñ süzlärenä qarağanda, Tatarstan mäktäplärendä älege eşçänlekne alıp baru öçen xoquqı nigez buldırılğan, küpsanlı beleşmälär, kitaplar, cıyıntıqlar näşer itelgän. Balalarnıñ häm uqıtuçılarnıñ sälämätlegen saqlaw häm nığıtuğa birelgän finanslarnıñ küläme dä şaqtıy artqan, mäktäplärgä yaña sport cihazları alınğan. Kimçeleklärgä kilgändä, Älfiä Urmançeeva alar arasında qayber mäktäplärdä älege eşkä iğtibarnıñ citep betmäwen, maxsus äzerlek ütkän belgeçlärneñ bulmawın bilgeläp ütte.

Bügengä köndä, Mäğärif häm uquçılarnıñ sälämätlege digän programmanıñ berençe öleşe tämamlandı. Xäzer inde mäğärif oyışmaları programmanıñ ikençe öleşenä kereşälär. Kollegiädä Mäğärif ministrlığınıñ attestatsiä häm akkreditatsiä bülege citäkçese Färid Kärimullin älege programmanıñ ikençe etabınıñ töp nigezläre belän tanıştırdı. Ä Çallı, Yäşel üzän, Bögelmädän kilgän mäğärif oyışmaları wäkilläre uquçılarnıñ sälämätlegen saqlaw, nığıtu eşendä üzläreneñ täcribäläre belän urtaqlaştılar. Düşämbe könne uzğan cıyılışta şulay uq Sälämätlekkä öyrätü üzägen oyıştıru turında da süz bardı. Bu xaqta Evropa berlegeneñ Rusiä mäğärif oyışmalarında sälämätlekkä öyrätü proyektınıñ töbäk koordinatorı Fäniä Xäbirova çığış yasadı. Bu üzäklärneñ maqsatı – balalarnıñ sälämätlegen saqlaw häm nığıtu öçen törle programmalar äzerläw, mäğärif oyışmalarına şuşı yünäleştä eş alıp baruda yärdäm kürsätü, sälämät tormış alıp barırğa öyrätü häm başqa şundıy eşlär.

Şulay ütep, respublika mäktäplärendä balalarnı sälämätländerü östendä şaqtıy küp eş alıp barıla. Läkin, qızğanıçqa qarşı, älegä bu eşçänlek kenä citmi küräseñ. Çönki Tatarstanda Rusiä belän çağıştırğanda awıru balalarnıñ sanı kebek kürsätkeç kimräk bulsa da, ul azayuğa taba barmıy. Älegä bar ömetne Mäğärif häm uquçılarnıñ sälämätlege digän programmanıñ ikençe etabına bağlarğa qala.

Gölnaz İlgizär

XS
SM
MD
LG