Accessibility links

җомга, 9 декабрь 2016, Казан вакыты 06:54

Qazanda "Näwrüz" bäyrämen qarşı aldılar


Törki xalıqları bu bäyrämne bik borınğıdan bäyräm itkän. Bıyılğı «Näwruz» bäyräme dä sornay, baraban, buben kebek muzıka qorallarında uynap xalıqnı bäyrämgä çaqırudan başlanıp kitte. Tabiğät''neñ yañarışına şatlanıp, törle uyınnar uynap, cırlar cırlap,öydän-öygä Näwrüz äytep yörep, yaznı şulay qarşı alğannar. Ä Sovet çorında bu bäyräm xökümät tarafınnan tıyılğan. İl tarqalu belän xalıqlar üzläreneñ milli bäyrämnären yañadan yañartıp uzdıra başlağanğa da inde 16 yıl uzıp kitkän ikän. Respublikanıñ Qazandağı «Duslıq yortı»nda oyışqan azerbaycan cämğite citäkçese Elmursan Mannapov äytüençä, Qazanda «Näwruz»ne yañadan bäyräm itü1988 yılda «Tatar yäşläre» oyışması belän başlanğan bulsa, azerbaycanlılar bügen dä bu bäyrämne zurlap uzdıralar. Alar bu yılğı «Näwruz» bäyrämenä Azerbaycan respublikasınıñ İsmäğil’le şähärennän «Babadağ» ansamblen çaqırğannar.

«Näwrüz» bäyrämenä Azerbaycannan, Üzbäkstannan, Orenburdan, Qırğızstannan kilgän qunaqları bäyrämgä cıyılğan xalıqnıñ küñelen kürdelär. Ä Qazanda eşmäkär bulıp tanılğan Bilal äfände Аzerbaycannan üzeneñ 80 yäşlek ätise Zäynul Xäydarovnı çaqırğan.

7-8 yäşlärdäge gruzin biyüen biegän Timur Gazizov ta,10 nçı tatar gimnaziäsendä uqığan uquçılarnıñ xoreografik ansambleneñ çığışı da , Qazan konservatoriäsen tämamlap Qazanda yäşärgä qalğan ätise üzbäk,änise tatar millätle yeget Ruslan Bahadir da konsertta tamaşaçı mäxäbbäten yauladılar.

Qısqası,bu bäyrämdä balalar da, babaylar da , yäşlärdä bäyräm itte. Bäyrämdä azerbaycannar plau belän sıylasa, üzbäklär şirbätle sümäläk belän sıyladılar.

Bäyrämdä cämäğät eşleklese Fändäs Safiullin da bar ide .Ul bäyräm respublika külämendä uzdırılsın ide, digän teläk belderde. «Näwruz»bäyräme Qazan şähärendä bik küp tuğandaş törki xalıqları duslığınıñ ber küreneşe buldı.

TR Mädäniät ministrlığınıñ Qazan şähäre xakimiäte mädäniät idaräse , «Duslıq yortı» assotsiatsiäse, häm milli cämğiät oyışmaları uzdırğan bu bäyräm, xalıq küñelenä bik xuş kilde.Azatlıq radiosı Mälikä Basıyr Qazan .

XS
SM
MD
LG