Accessibility links

дүшәмбе, 5 декабрь 2016, Казан вакыты 01:35

Hamasnıñ ruxi yulbaşçısı şeix Äxmäd Yassin cänazasına 200 meñnän artıq keşe qatnaştı


Bügen İsrael boralaqlarınnan yasalğan höcüm näticäsendä fälestinnärneñ Hamas törkeme yulbaşçısı häm ruxi citäkçese Şeix Ahmed Yassin hälak buldı. Anı kümü yolasına 200 meñnän artıq fälestinle qatnaşqan dip xäbär itelä. İnde distä yılğa yaqın Gazada monıñ qadär keşeneñ cıyılğanı yuq ide. Fälestin suğışçıları Yassinnıñ üleme öçen üç alaçaqların belderde. İsrael premyer-ministrı Ariel Şaron xärbi köçlärne uñışlı xärbi çara belän qotladı, İsrael radiosına birgän añlatmalarında Şaron "terrorğa qarşı suğış äle tämamlanmadı, ul här cirdä, här kön däwam itäçäk" dip belderde. İsrael saqlanu ministrı Şaul Mofaz, Yassin 2000nçe yıldan birle Hamas İsrael xalqına qarşı oyıştırğan bik küp höcümnärdä ğayeple, dip belderde: "Ahmed Yassin – terrorçılar yulbaşçısı ide, fälestin Bin Ladenı ide. Anıñ qulları yähüdlär, balalar, xatın-qızlar häm yäş sabıylar qanına batqan ide. Ul İsraelgä qarşı höcümnär oyıştırırğa dip üz suğışçıların cibärde," dip belderde İsrael saqlanu ministrı. Waşingtonda, Aq Yortnıñ Milli İminlek kiñäşçese Condoleezza Rice, İsrael bu höcümne Amerika Quşma Ştatları belän kileşep eşläde, digän fikerne kire qaqtı, ike yaqnı da köç qullanmasqa çaqırdı. Dönya cämäğätçelege Yassinnıñ üleme – Yaqın Könçığışta köç qullanunıñ yaña dulqını başlanuına kiteräçäk, dip borçılu belderde.

XS
SM
MD
LG