Accessibility links

пәнҗешәмбе, 8 декабрь 2016, Казан вакыты 12:53

Finlandiädä yäşäp icat itüçe cırçı Cämilä Nizametdin Tatarstanda bulıp kitte


Cämiläneñ bu yulı Qazanda programması şaqtıy tığız başlanıp kitte. Ul poyızdan töşügä ük eşkä çumdı. Berençe bulıp “Xomay” törkeme belän “Yazma miña xatıñnı” digän cırına remiks yazdırdı. Häm şul uq könne tönlä älege cır tatar yäşläre öçen oyıştırılğan “Küñel” diskotekasında yañğıradı.

Äytergä kiräk, ägär uzğan köz könne kilgändä Cämilä kübräk Tatarstannı sağınu, tuğan yaqqa tartılu, üzeneñ Finlyandiädäge tormışı turında söyläsä, bu yulı Intertatta uzğan matbuğat oçraşuında ul kübräk milli muzıka, yaña cırları, al'bom çığaruğa tuqtaldı. Monda bilgele Cämiläneñ prodyuserı barlıqqa kilüeneñ dä säbäbe bardır. “Tatar radiosında” alıp baruçı bulıp eşlägän Läysän Gäynetdinova äle prodyuserlıq eşendä täcribäse bulmasa da, Cämilä anıñ tawışın yaratuın äytte. “Bez Finlyandiädäge tatarlar irtädän alıp kiçkä qadar “Tatar radiosın” tıñlıybız. Häm tawışlarnı çağıştırabız”, - dide ul. Läysän isä çınnan da 3 yıl muzıykal' radioda eşläp, muzıqa dönyasında şaqtıy ğına täcribä tuplağan. Şuña Cämiläneñ al'bomın çığaruğa da inde äzerlek eşen dä başlağannar. Al'bom cäy könne çığaçaq, Häm “Cämilä” dip atalaçaq ikän. Cämilä üzen kiläçäktä rok yunäleşendä dä sınap qararğa uylawın äytte. Ämma qaysı ğına muzıka bulmasın ul berençe çiratta millilek saqlanırğa tieş, di. Äydägez, Cämiläneñ üzen tıñlap qarıyq

Muzıka üzeneñ milli koloritın saqlarğa tieş. Cırçı Qazaqstannanmı, Üzbäkstannanmı anıñ cırında milizmatika çağılırğa tieş. Ul şunıñ belän qızıqlı da. Xäzer Yevropa cırları bik küp. Tatar cırı üz millilegen saqlasın ide.

Tatarstanğa kilgäç Cämilä “Käyef niçek?” konsertında qatnaştı, Derbışqadağı balalar yortında bulıp televizor büläk itte. Cämilä üze äti-änisez üskängäme, yätim balalarğa zur iğtibar birüen äytte. Anıñ maxsus “Yätim bala” digän cırı da bar.

Şulay uq Cämilä tatar internetınıñ iñ aktiv wäkilläre belän oçraştı. Bıltır, Mişärcan, Keräşen mullası häm tağın küp kenä niklı internetçiklar Cämiläneñ kiläçäk plannarı belän qızıqsındı. Ämma bu oçraşuda süz kübräk internet turında tügel, ä Cämiläneñ icatı turında bardı. Berençe bulıp Cämiläne internetqa çığarğan Azat Säyfetdinov isä, Cämilägä kübräk akapellağa, yäğni muzıykasıyz, üz tawışı belän genä cırlarğa kiñäş itte. Oçraşu “Tuğan tel”ne cırlaw belän tämamlandı. Älege cırnı cırlağanda Cämiläneñ küz yäşläre dä çıqtı. “Bu minem şatlıqlı küz yäşlärem. Tatarstanda şundıy duslarım bulğanğa min bik şatlanam”, - dide ul. Äye, yämle bulsa da torğan cir, sağındıra tuğan il dip cırlana şul. Cämilä dä bik sağına tösle toyıldı miña Tatarstannı.

Landış Xarrasova

XS
SM
MD
LG