Accessibility links

шимбә, 10 декабрь 2016, Казан вакыты 12:01

Arbitraj idäräçe ni eşlärgä tieş?


Sişämbe könne Ministrlar Kabinetında respublikada xezmät xaqın waqıtında tüläw häm eş tä'min itüçelärneñ mäcbüri pensiä iminlege zakonın ütäwne tikşerü vedomstvoara komissiä utırışı uzdı. Anı premyer-ministr urınbasarı Rawil Moratov alıp bardı.-dielä räsmi xäbärlärdä. Älege komissiä mondıy utırışlarnı daimi ütkärep kilä. Yıl başında ütkärelgän şundıy utırışnıñ kierenke baruı xaqında söylägän idek. Çönki ul utırış yıl azağında respublikada xezmät xaqı burıçları artu tendensiäse bar ide. Bu yulı 20 martqa cıyılğan mäğlümatlarça, xezmät xaqı burıçları şaqtıy kimegän. Bankrotlıq protsessı başlanğan 310 şirkätneñ 110 million sum çaması häm tağın 124 normal' eşläwçe şirkätneñ 109 million sum xezmät xaqı burıçı bar. Xezmät xaqı burıçları problemasın xäl itü öçen buldırılğan bankrotlıq institutı Tatarstanda 5 yıl çaması yäşäp kilä. Anıñ başında xökümät komissiäse, aña buysınğan antikrizis komitetı, xoquq saqlaw oyışmaları häm bankrotlıq protsessın başqaruçı arbitraj idaräçelär kerä. Älbättä, iñ awır eş şul arbitraj idaräçelärgä töşä. Komissiä utırışında arbitraj upravlyuyaşçiylarnıñ eşe analizlandı. Tänqitlise tänqitlände, büläklänäse büläklände, läkin arbitraj idäräçelär bu eştä şaqtıy ğına täcribä tuplağannar. Tizräk, kübräk digän genä tänqit belän genä kileşmädelär. Bu eştä 5 yıldan artıq eşläwçe arbitraj idäräçe Röstäm Xäyrullin xaqimiätneñ üzen tänqitläde... Çönki arbitraj idäräçelär bankrotlıq protsessın axırınaça, yäğni milken-mölkäten qaytaru öçen mäxkämä eşenä citkergäç, xakimiät dairäläre, xoquq saqlaw oyışmaları yärdäm itmilär. Kiresençä, bankrotlıqnı axırınaça citkerüçe arbitraj idäräçelärne ezärlekläü küreneşläre bar. Häm täcribäle arbitraj idäräçe bankrotlıq institutınıñ ni öçen buldırılğanın iskä töşerde... Yäğni bankrotlıq ul bazar iqtisadı instrumentı. Ul niçek ta bulsa xezmät xaqı burıçların qaplaw öçen genä eşlämi, ä bölgenlekkä çıqqan şirkätlärne finans yaqtan ternäkländerü, safqa bastıru öçen eşli. Komissiä räise Rawil Moratov mondıy dälillär belän kileşte häm arbitraj idäräçelären xezmät şartların yaxşırtu çaraları küreläçägen wäğdä itte.

Yunıs Ätnäle, Qazan.

XS
SM
MD
LG