Accessibility links

Кайнар хәбәр

Udmurtiä tatar ictimaği üzägeneñ altınçı qorıltayı tınıç, eşlekle räweştä uzdı


Udmurtiä tatar ictimaği üzägeneñ altınçı qorıltayına delegatlar, qunaqlar 20n mart könne İjaw qalasınıñ filarmoniä binasına cıyıldı. Elek şuşındıy çaralarğa xalıq küpläp kilä ide. Xäzer zalda 300läp kenä keşe buluın kürep, üzäkneñ äğzaları da, qorıltayğa Çallıdan kilgän Bötendönya tatar kongressı başqarma komitetı äğzası Fäwziä Bäyrämova häm «Azatlıq» yäşlär oyışması citäkçese Tälğät Äxmädişin da ğäcäpländelär. Şulay uq elekkege yıllardağı kebek respublikanıñ berençe türäläre dä zalda yuq ide. Tatar ictimaği üzägeneñ zur cıyınında ictimaği oyışmaları belän turıdan- turı eşläwçe däwlät orğanı — milli säyäsät ministrı urınbasarı Natal'ya Smirnova häm mäğärif ministrınıñ milli belem birü bülege citäkçese Yuri Fomin ğına qatnaştılar. Ä matbuğat häm mäğlümat ministrı urınbasarı Näzirä Kasimova häm İjaw şähäreneñ İndustrial' rayonı başlığı yärdämçese Fidail' Xäsänov qorıltayğa tatar milläte wäkilläre bularaq qızıqsınıp kilgännär. Berençe atağan keşelär cıyınnıñ başında uq çığış yasap, eşläre küplegenä sıltap, yuq buldılar.

Qorıltayda bıyıl xalıqnıñ az buınıñ bälki uñay yağı da bulğandır — cıyın başqa yıllardağı belän çağıştırğanda, tınıç, tartqalaşsız, eşlekle räweştä uzdı. Ber genä keşe dä kükräk kierep, xoquq dawlamadı, kritika da konstruktiv yañğıradı. Çığış yasarğa teläge bulğan här keşe dä üzeneñ fikerläre belän urtaqlaştı, täqdimnären kertte.

Moña Fäwziä Bäyrämova dä basım yasap ütte.

Аudio

Qorıltaynıñ eşendä milli xäräkättä ozaq yıllar «qaynawçılar» ğına qatnaşuı, millätneñ yazmışı turıda uylanuçılar cıyıluı, respublikada yäşäwçe tatarlarnıñ ixtiacların qänäğätländerergä, problemalarnı xäl itärgä omtıluçılar buluı — här çığış moña dälil. Ä şulay da iñ köçle, xalıq küñelenä kerep qalğan, uylanularğa kitergän çığışlardan Tatar ictimaği üzägeneñ Maqtawlı Prezidentı Mäsğut Garatuyev häm yazuçı, tanılğan säyäsätçe Fäwziä Bäyrämovanıqı bulğandır.

Mäsğut ağa çığışında millättäşlärebezneñ zalda az buluın — üz mänfäğätlären genä qayğırtıp yäşäwdän, milli xäräkät wäkilläreneñ xalıqnıñ üzañın uyatuğa ireşä ala almawı, dip bilgeläp ütte. Mäsğut ağa bügenge däwlät säyäsätendä millät yuq, ämmä ul rus millätenä qağılğanda ğına barlıqqa kilä dip, moña misal itep ul rus telen elekkege SSSR illärendä niçek saqlap qaluğa omtılunı häm anda yäşäwçe rus xalqınıñ xoquqların yaqlawnı kiterde. Rusiädä yäşäwçe başqa millätlärneñ telen yuğaltuğa iltkän säyäsätne tuqtatu öçen üzebezgä aktivlıq kürsätergä, xalıq arasına yışraq çığarğa kiräk dip assızıqladı. Mäsğut äfände Garatuyev açınıp, «..bügen törle töbäklärdä faşizm köçäyep kitte», dip säyläde. Şuşındıy qara köçlärgä qarşı torır öçen ictimaği xäräkät ber törkem keşe belän genä uñışqa ireşä almas, Ğayaz İsxaqi süzlärençä, bezne rätlärebez berdäm häm quyı buluı ğına qotqaraçaq dide.

Audio

Här çığış yasawçı millätneñ kiläçäge turında — tuğan telendä uquçı balalar sanın arttırunıñ yulların ezläw, mädäniätne üsterü, yäşlärne islam dine nigezläre belän tanıştıru kebek mäs’älälärgä basım yasadı. Alar barısı da qorıltayda qabul itelgän rezolyutsiädä dä çağılış taptı. Delegatlar üzäkneñ Ustavına da üzgäreşlär kertte, yaña şura häm anıñ citäkçesen sayladı. Kiläse öç yılda TİU belän qabat Fnün Mirzayanov citäkçelek itäçäk. Ul kiläçäkkä plannar bilgeläp, bolay dide

Audio

Qorıltaydan delegatlar nindi xislär belän kitte soñ

Audio

Udmurtiä Tatar ictimaği üzägeneñ altınçı qorıltayınnan yazmalarnı «Azatlıq» radiosı öçen İjawdan Xämidä Ğayfullina äzerläde.

XS
SM
MD
LG