Accessibility links

Кайнар хәбәр

Rusiä flotı: Admiral Kuroyedovnıñ mäğlümati "şartlatuı" artında şäxesara qarşılıqlar yata


Rusiä xärbi diñgez köçlären sişämbedä yaña "şartlaw" teträtte, xörmätle tıñlawçılar. Bu yulı ul süzlärdä genä bulsa da, alarnıñ xärbi diñgez flotı başlığı admiral Vladimir Kuroyedov tarafınnan äytelüe Rusiäne genä tügel, bar dönyanı da şomğa saldı. Admiral açıqtan-açıq, Rusiä xärbi flotın safta totu torğan sayın zurraq qurqınıç tudıra digän mäğnädä belderü yasadı.

Bar dönyada şom uyatqan xäbärne "İnterfax" agentlığı tarattı, xörmätle tıñlawçılar. Ul Admiral Kuroyedovnıñ, sişämbe könne Saqlanu ministrlığında prezident Putin qatnaşında ütkän kiñäşmädä xäbärçelärgä, Tönyaq flotnıñ flagmanı "Petr Berençe" kreyserı şul xätle yaman texnik xäldä ki, ul teläsä nindi mizgeldä şartlıy ala dip äytüen xäbär itte. Anıñ şuşı süzlären şunda uq bar dönya xäbär agentlıqları eläkterep aldı - äle bıltır ğına flotnıñ iñ yaxşı korabı dip iğlan itelgän 24 meñ tonnalı "Petr Berençe" Rusiä xärbi diñgez flotınıñ iñ aldınğı, zamança köymäse sanala ide. Borçılunı tağın şul da arttırdı - kreyserda atom caylanması urnaştırılğan häm admiral Kuroyedov moña ayıruça basım yasadı. Läkin berniçä säğät ütü belän ul üzeneñ şuşı süzlärennän waz kiçep, kire xärbi nığıtmasına qaytu ämere birelgän "Petr Berençe" keşelär iminlegenä yanamıy, atom caylanması bernindi dä qurqınıç tudırmıy dip belderde. Tönyaq flot flagmanın tänqitläw barı tik, andağı diñgezçelärneñ tormış şartları naçar buluı belän genä añlatıla bulıp çıqtı. Şul citeşsezleklärne beterü öçen korab başlıqlarına 2 atna waqıt birelä, şunnan soñ ul yänä künegülärgä quşılırğa tieş bulaçaq. Atom caylanmasında citdi problemalar tabılğan bulsa, alarnı xäl itü öçen 2 atna ğına citmäs ide. Alay bulğaç, admiral Kuroyedovnıñ şom salğan belderüe artında ni yata soñ digän soraw tua. Tönyaq flot xezmätkärläre fikerençä, "Petr Berençe" tiräsendäge ğawğa, Kuroyedovnıñ mäxkämädä üzenä qarşı kürsätmälär birgän ikençe ber admiral İgor'' Kasatonovqa üzençä üçe bulıp tora. Kreysernıñ kapitanı bulıp admiralnıñ tuğanı, kontr-admiral Vladimir Kasatonov tora. Şuşı könnärdä genä, İgor'' Kasatonov uzğan atnada Severomorskidağı xärbi mäxkämädä kürsätmälär birep, alarda Kuroyedovqa qarşı söylägän dip xäbär itelde. Älege mäxkämä bıltır awgustta inde saftan alınğan ber su astı köymäseneñ batuın tikşerä. Şul qazada 9 xärbi diñgezçe hälak bulğan ide. Admiral Kasatonov mäxkämädä, qaza öçen cawaplılıq xärbi diñgez flotı başlığında da, yäğni Kuroyedovta da yata, çönki saftan alınğan korablarnı çüplekkä iltü qağidälären ul raslağan ide dip beldergän. Şulay itep Kuroyedovnıñ xäwefle soñğı belderüe artında şäxesara qarşılıqlar, Rusiä admirallarınıñ ber-bersen önäp betermäwe yata dip yaza qayber urıs basmaları. İkençe yaqtan, Rusiä xärbi diñgez flotınıñ soñğı yıllarda aqça qıtlığı kiçerüe ser tügel, admiral Kuroyedov başqa şartlarda äytä almağan süzlärne äytte digän fiker dä bar. Aqçasızlıqtan intekkän flotnı safta totu torğan sayın qurqınıçraq bula bara. Fivral'' urtalarında ütkän xärbi künegülärdä raketalar cibärü belän bulğan problemalar näq menä şul xaqta söyli. Admiral Kuroyedov, şul şomlı belderüen yasağan kiñäşmädä, uñışsızlıqlarnı qorallarnıñ iske buluı belän añlattı. "Petr Berençe" räweşendäge tağın ike korabnıñ - "Admiral Uşakov" häm "Admiral Naximov" kreyserlarınıñ aqça bulmaw säbäple inde yıllar däwamında diñgezgä çıqqanı yuq.

Kärim Kamal, Praga
XS
SM
MD
LG