Accessibility links

Кайнар хәбәр

Uqıtuçılarnıñ uqıtuçıları bäyräm itä


Tatarstan mäğärif xezmätkärläreneñ belemen kütärü institutı 1928 yılda tözelä. Ul üzeneñ eşen çittän torıp uqıta torğan kurslar räweşendä başlap cibärä. Anıñ eşeneñ töp maqsatı bulıp däresleklär tözü häm bastıru tora. Läkin respublikada yıldan-yıl mäktäplärneñ sanı artu, uqıtuçılarnıñ belemen kütärügä ixtiac älege institutnıñ eşen üzgärtä, yaña yünäleşlär aça. Anda qısqa waqıtlı pedagogik kurslar, uqıtuçılar öçen kiñäşmälär, seminarlar, uqular ütkärelä başlıy. Xäzer isä uqıtuçılar belemen kütärü institutı xezmätkärläreneñ eşläre tağın da arttı. Bügenge köndä anda törle fännär buyınça kafedralardan tış, 14 uqıtu-metodika laboratoriäse, mäğlümät üzäge, törle belgeçleklär buyınça yañadan äzerläw fakul’tetları eşläp kilä. İnstitut xezmätkärläreneñ 76 protsentı ğilmi däräcägä iä. Monda eşläwçelär tarafınnan küp kenä kitaplar, däresleklär, uqıtu-metodik qullanmalar da näşer itelä. Kollektivnı inde küp yıllar rättän pedagogiä fännäre doktorı, professor Räşit İslamşin citäkli. Anıñ fikerençä, institutnıñ xäzerge köndä töp burıçı – mäğärif xezmätkärläreneñ belemen kütärü häm yañadan äzerläwneñ sıyfatın arttıru, pedagogik kurslarnı zamança taläplärgä cawap birä torğan itep oyıştıru. Ä biredä 1959 yıldan birle eşläwçe professor Märyäm Xasanova üzläreneñ eşçänlekläre turında menä nindi fikerdä.

Min üzebezneñ institutıbızdan başqa respublikanı küz aldına da kiterä almıym. Bez ğömer buyı pedagoglar, uqıtuçılar belän eşlibez. Alar barısı da bezneñ hönärdäşlärebez, icattaşlarıbız. Şular belän aralaşıp, alarnıñ täcribälären urtaqlaşıp, aldınğı täcribälärne bez respublikanıñ da, Rusiäneñ dä milli mäktäplärenä taratırğa tırışabız

İnstitutnıñ eşçänlegeneñ tağın ber möhim yağı xaqında äytep kitäse kilä. Monda tatar telen saqlap qaluğa, Tatarstannıñ ğına tügel, Rusiäneñ küp kenä töbäkläreneñ tuğan tel häm ädäbiäte uqıtuçılarınıñ belemen üsterügä zur iğtibar birälär. Tatar tele häm ädäbiäte laboratoriäse qarşında eşläp kilüçe maxsus fakul’tetta xäzerge köndä Çiläbe, Sverdlaw, Kurgan ölkäläre uqıtuçıları belem ala.

Älege mäğärif oyışması turında bik küp, ozaq söyläp bula. Läkin äydägez äle çärşämbe könne ütkän bäyräm çaralarına qaytıyq. Yubiley uñayınnan oyıştırılğan zur fänni-ğämäli konferensiädän soñ, institut xezmätkärläre öçen bäyräm tantanası ütte. Anda respublika citäkçelege isemennän çığış yasawçılar Zilä Wälieva häm Mintimer Şäymievneñ qotlaw süzlären citkerdelär. Yubilyar institutnıñ xezmätkärlären qotlarğa Tatarstannıñ Mäğärif ministrı Farız Xarisov da kilgän ide.

Annan soñ institut xezmätkärläre öçen ayıruça dulqınlandırğıç mizgellär buldı. Alarnıñ iñ layıqlılarına Farız Xarisov Tatarstan häm Rusiä Mäğärif ministrlıqlarınıñ büläklären tapşırdı. Uqıtuçılarnıñ uqıtuçıların qotlarğa Qazan däwlät pedagogiä institutınıñ qızlar xorı, Qazan konservatoriäse cırçıları kilgän ide. Alar yubilyarlarnı matur äsärlär başqarıp qotladılar. Bez dä alarğa quşılıp, 75 yılın tutırğan institut xezmätkärlären yubiley belän qotlıybız häm alarğa kiläçäktä tağın da zurraq uñışlar telibez.

Gölnaz İlgizär

XS
SM
MD
LG