Liviä başqalasınnan yıraq tügel bügen Britaniä premyer-ministrı Tony Blair häm Liviä başlığı Muammar Kadafi oçraştı.
Blair – ikençe dönya suğışı waqıtında biregä kilgän Winston Çurçil'dän soñ Britaniäneñ ikençe räsmi yuğarı däräcädäge qunağı buldı. Älege säfär Liviäneñ uzğan dekabr ayında küpläp üterü qoralınnan waz kiçüe turında iğlan itkänennän soñ mömkin buldı.
Liviä tışqı eşlär ministrı Abdel-Rahman Şalqam, Liviä häm Britaniä "Al-Qaidağa qarşı köräş berlegen tözede" dip belderde.
Britaniä premyerı Blair, Liviäneñ könbatış belän xezmättäşlek itä başlawı – ğaräp dönyasına – möhim signal, dide, häm Liviäneñ küpläp üterü qoralınnan baş tartu plannarına xuplaw belderde: "Ägär dä bez, qurqınıç ximik yä biologik qoralğa iä bulğan başqa illärgä – ul qoral programmalarınnan baş tartıp bula, aña cawap itep dönya cämäğätçelegennän yaxşı mönäsäbät bulaçaq digän ürnäk kürsätä alabız ikän – elekke zamannardağı doşmanlıq betäçäk, barıbıznıñ da tormışı iminräk bulaçaq", dide Blair.
Blair'nıñ Liviägä baruı – şulay uq Liviäneñ könbatış belän mönäsäbätläre yaxşığa taba üzgärüenä işarä bulıp tora. Küptän tügel Kadafi belän İspaniä häm İtaliä räsmiläre oçraştı. Häm bu atnada Amerikan däwlät sekretare urınbasarı William Burns, Tönyaq Afrikadağı bu ilgä 30 yıl eçendä kilgän iñ yuğarı däräcädäge amerikan wäkile buldı.
