Accessibility links

якшәмбе, 4 декабрь 2016, Казан вакыты 11:14

Ufağa Çiläbe ölkäse wäkilläre törkeme kilde


Comğa könne Başqortstanğa gubernator Petr Sumin citäkçelegendä Çiläbe ölkäse wäkillege ber könlek eş säfäre belän kilde. Qunaqlar arasında ölkäneñ räsmi dairäläre dä, zur şirkätlär citäkçeläre dä, bilgele eşquarlar da bar. Kürşe töbäktän kilgän qunaqlarnı Ufa hawa alanında Başqortstannıñ iñ yuğarı citäkçeläre qarşı aldı. İñ täwdä zur oçraşu başqalada Xökümät yortında oyıştırıldı. Anda Başqortstan Prezidentı Mortaza Räximov, Premier – minister Rafael Baydäwlätov häm başqa räsmi wäkillär qatnaşlığında söyläşülär uzdı. Annan soñ qunaqlar töşkä qädär Ufadağı berniçä zur şirkät eşçänlege belän tanıştı, şulay uq alar başqalanıñ kürkäm urınnarınnan «Lalä – Tyülpän» mäçetendä, Ufa «Nur» tatar däwlät teaterında häm başqalanıñ tarixi istälekle cirlärendä buldı. Könneñ ikençe yartısında Çiläbe ölkäse räsmi wäkillege belän eşlekle söyläşülär başlandı. Andağı fiker alışulardan häm üzara faydalı bäyläneşlärneñ täğäyen proektları belän almaşqannan soñ, ike töbäk arasında säwdä – iqtisadí, fänni – texnik, sosíal häm mädäni xezmättäşlek turındağı Kileşüne tormışqa aşıru buyınça Berketmäne imzalaw tantanası ütte. Ä soñınnan älege säfär yomğaqları buyınça ike kürşe töbäk citäkçeläreneñ jurnalistlar öçen matbuğat oçraşuı oyıştırıldı. Çiläbe ölkäse belän Başqortstan arasında üzara xezmättäşlek häm duslıq turında Kileşü 1998 yılda tözelgän ide. Tağın ber yıl ütkäç, Çiläbedä Başqortstannıñ daimi wäkilçelege dä açıldı. Şunnan soñ ike töbäk arasında üzara faydalı iqtisadí bäyläneşlär genä tügel, ä mädäni elemtälär dä canlanıp kitkän ide. Başqortstan belän Çiläbe ölkäse arasındağı duslıq cepläreneñ nığuı xaqında Başqortstan Tışqı bäyläneşlär häm säwdä ministerlığı xezmätkäre Möxämmät Bağíşayıv «Azatlıq» radíosına tübändägelärne citkerde. (yazma) Sez Başqortstan belän Çiläbe ölkäse arasındağı xezmättäşlek xaqında republíknıñ Tışqı bäyläneşlär häm säwdä ministerlığı xezmätkäre Möxämmät Bağíşayıv fikerlären tıñladığız. Petr Sumin citäkçelegendäge Çiläbe ölkäse räsmi wäkillege Ufağa ber könlek eş säfären tämamlap, kiçen oçqıç belän tuğan yağına qaytıp kitte.

XS
SM
MD
LG