Accessibility links

якшәмбе, 11 декабрь 2016, Казан вакыты 05:18

Matbuğat küzätüe


Comğa Tatarstan xäbärlär cıyıntığın ğädättägeçä respublikada dönya kürgän tatarça gäcitlärgä qısqaça küzätü belän tämamlıybız. Bügen küzätüne Mädäni comğa gäcitennän başlıybız. Anıñ 26 mart sanı yazuçı Mädinä Malikovanıñ uylanuları belän başlanıp kitä. Xoquqlarnı bezgä büläk itep birmäslär dip isemlängän yazmada Mädinä xanım 8 mart bäyräme uñayınnan, şaqtıy ğına soñarıp bulsa da, tatar xatın-qızları qayçan üz xaqları öçen köräşkä çığar ikän digän temağa fikerläre belän urtaqlaşa. Ä Alabuğadan Fänis Xäkimov häm Firdäwes Xucin gäcit bitlärendä äxlaq temasına iğtibar yünältälär. Yaxşıdan yaxşılıq tua, naçardan – naçarlıq digän mäqälädä alar xäzerge zamannıñ ruxi, äxlaqı problemalarına küz salıp, üzläreneñ täqdimnären dä citkerälär. Tele barnıñ – ile bar rubrikasında Mädäni comğa uquçılarnı Başqortstan tatar kongressı Başqarma komitetı räise urınbasarı Radik Sibäğätovnıñ çığışı belän tanıştıra. Ğalim anı küptän tügel genä Ufada ütkän Bötendönya tatar kongressınıñ küçmä utırışında yasağan. Yazmada süz kürşe respublikada tatar teleneñ torışı, anıñ haman da däwlät tele statusın almawı turında bara. Ğämäldäge qanun xäzerge xälendä tatar belän başqortnı berläştermi, ber-bersenä qarşı ğına quya, dip sanıy Radik Sibäğätov. Annan tış, gäcit 27 mart – Xalıqara teatr köne uñayınnan yazmalar da urnaştırğan. Alardan Ğäliäskär Kamal teatrı artistı Fänis Cihanşanıñ tormışı häm icatı belän tanışıp, säxnä yañalıqları, Qazan teatrlarında bara torğan spektakl’lär xaqında belep bula. Älege datağa bağışlanğan mäqälälär Watanım Tatarstannıñ comğa sanında da urın alğan. Şulay uq monda Qazannıñ meñyıllığı uñayınnan yazuçı Rafail Mostafin başqalanıñ tarixına küz sala. Bu yulı ul İosif Stalinnıñ ulı Vasiliy Stalinnıñ Qazanda sörgendäge waqıtı turında yaza. İzvestiä Tatarstana gäcite uquçılarğa respublikadağı atnalıq yañalıqlardan başqa, Säyäsät rubrikasında jurnalist Rimzil Wäliev belän äñgämä täqdim itä. Ul Partiynıy çinovnik doljen slujit’ vsemu narodu, yäğni, Firkä çinivniğı bar xalıqqa xezmät itärgä tieş, dip atala. Anda gäcitneñ baş möxärrire Aleksey Toporovnıñ Ciñüçe firkädän närsä kötärgä digän sorawına ul menä niçek cawap birä. Älegä firkä xäzer barısı öçen dä cawaplılıqnı üz östenä alırğa tieş bula. Berdäm Rusiä firkäsenä tawış birüçelär alarnı Putin häm Şäymievkä işınap sayladılar. Şuña kürä, alar bar xalıqqa da xezmät irägä tieş, dip cawap birä. Saylawlardağı administrativ resursqa kilgändä isä, Rimzil Wäliev bu Mintimer Şäymievneñ komandası köçeneñ kürsätkeçe, dip sanıy. Älege xäl bügenge könneñ taläplären häm xalıqnıñ fikerlären sürätli, di ul.

Gölnaz İlgizär

XS
SM
MD
LG