Accessibility links

Кайнар хәбәр

Yevropa Berlege terrorğa qarşı xezmättäşlekne nığıtu xaqında kileşä


Yevropa Berlege illäre citäkçeläre üzläreneñ Brüsseldä barğan yuğarı däräcäle oçraşuında terrorğa qarşı köräş ölkäsendä qayber citdi çaralar kürergä buldı. Martnıñ 11-endä Madridta bulğan şartlawlardan soñ Yevropa illäre xäzer terrorğa qarşı üzara xezmättäşlekne arttırırğa teli häm anı iñ yuğarı däräcädä köyläw öçen maxsus wäkil bilgeli.

Yevropa Berlege citäkçeläreneñ här yartı yıl cıyılıp torğan summitı, yäğni yuğarı däräcäle oçraşuı başta bötenläy başqa mäs''älälärne qararğa tieş ide, xörmätle tıñlawçılar. Berlek äle haman da üz Konstitutsiäsen qabul itü xaqında urtaq fikergä kilä almıy häm Brüsseldäge oçraşuda töp iğtibar näq menä şuña bireler dip kötelde. Läkin mart başında Madridnı teträtkän şartlawlar summit kön tärtibenä üzgäreşlär kertte häm anıñ inde berençe köne ük Yevropanıñ terrorğa qarşı köräşen köçäytü, äğza illär arasında xezmättäşlekne nığıtu mäs''älälären qarawğa bağışlandı. Bu ölkädäge xezmättäşlek turında maxsus matdäne elegräk berlekneñ Konstitutsiäsenä kertü qaralğan ide, läkin ul älegä qabul itelmägän, ä terrorğa qarşı köräş tieşle çaralar kürüne inde bügennän ük taläp itä. Yevropa Berlege illäre xäzer, äğza illärgä yasala alğan terror höcümnären buldırmaw yäisä alarnıñ näticälärennän arınu ölkäsendä üzlärendä bulğan bar mömkinleklärne faydalanıp yardäm kürsätü xaqında kileşä. Berlektä räislek itkän İrlandiäneñ premyer-ministrı Bertie Ahern monıñ ähämiaten bolay añlata:

Audio, Bertie Ahern

"Kileşü şunı bilgeli - xezmättäşlek yöklämäsen ğämälgä quyu mäs''äläsendä här äğza däwlät duçar bulğan ilgä üze xälennän kilgän çaralarnı saylap yardäm itä" dip añlata Yevropa Berlegeneñ terrorğa qarşı köräş ölkäsendäge yaña tör xezmättäşlek paktın İrlandiä premyer-ministrı Bertie Ahern. Şuşı kileşüdän tış Berlek, üz äğzalarınıñ terrorğa qarşı säyäsäten üzara köyläw öçen maxsus wäkilen bilgeli, kiläse atnada şuşı eşkä Hollanda wäkile Gijs de Vries kereşä. Ul berençe çiratta, äğza illärneñ küzläw xezmätläre arasında mäğlümat urtaqlaşunı köyläw belän şöğelläner dip kötelä. Älege wäkil Yevropa Berlegeneñ tışqı säyäsät häm iminlek ölkäsendäge ikençe ber yuğarı wäkile Javier Solana qulı astında eşliäçäk. Solana üze bu xaqta menä närsälär belderde:

Audio, Javier Solana

"Älegä iñ möhim närsä bulıp Yevropa Berlegeneñ ministrlar şurasındağı törle xäyätlär arasında yaxşıraq koordinatsiä buldıru tora, alar şäbräk, näticäleräk häm tizräk eşlärgä tieş. İkençedän, äğza illär arasında nığraq xezmättäşlek urnaştıru" di Gijs de Vriesnıñ wazifaları turında Javier Solana. Anıñ süzlärenä qarağanda, terrorğa qarşı eşne näticäle itü şunnan ğibarät - kiräk çaqta tiz genä qarar qabul itü, ägär anı parlament aşa ütkärü kiräk ikän, monı da tizräk eşläw. Yevropa Berlege citäkçeläre yaña anti-terror paktı xaqında bu yulı çağıştırmaça ciñel genä kileşsä dä, anı ğämälgä quyu niçek barır, monısın yaqın kiläçäk kenä kürsätä ala. Berençe tänqit inde yañğıradı da - keşe xoquqların saqlawçı törkemnär Berlekneñ yaña qararı telefon söyläşülären, elektron xatlarnı tikşerü öçen yul açaçaq dip kisätä.

Kärim Kamal, Praga
XS
SM
MD
LG