Accessibility links

җомга, 2 декабрь 2016, Казан вакыты 23:07

Ğaräp Ligası General Sekretare BMO İminlek Şurasına täñqit belderde


Ğaräp Ligası general sekretare Ämr Mussa bügen İsraelgä fälestin suğışçıları yulbaşçısı şeix Äxmäd Yassinnı ütergäne öçen kisken täñqit belderde. Tunista Liganıñ tışqı eşlär ministrları belän oçraşqanda Mussa şulay uq Quşma Ştatarnıñ Berläşkän Millätlär Oyışması İminlek Şurası resolüsiäsenä veto saluına da täñqit belderde: "İminlek Şurası veto belän bülenergä tieş tügel. Mine şul borçıy ki – İsrael bu wazğiätne üz maqsatında qullanıp üzeneñ isemlegendä bulğan keşelärne üterüne däwam itergä mömkin" dip belderde Ğaräp Ligası sekretare Ämr Mussa. Bügen Yaqın Könçığış, İran, Ğiraq häm Törkiädä möselmannar Yassinnıñ üterelüenä qarşılıq belderep uramnarğa çıqtı. Fälestin xakimiäte belderüençä, Amerika Quşma Ştatlarınıñ Berläşkän Millätlär Oyışması İminlek Şurası rezolüsiäsenä qarşı tawış birüe – İsraelne höcümnärne däwam itügä ruxlandıraçaq. Kiçä İminlek Şurasında İsraelne Hamas yulbaşçısı şeix Äxmäd Yassinnı üterüe öçen täñqitlägän resolüsiä ölgese tikşerelde häm Amerika Quşma Ştatları wäkile anda Hamasnı yözlägän yähüdne üterüne oyıştırğanı turında ber süz dä yuq, dip, resolüsiägä veto saldı. Amerikan yağı Yassinğa höcüm yasaluına "tirän borçılu" belderä, ämma mondıy "ber yaqlı" resolüsiä – Yaqın Könıçığta tınıçlıq buldıruğa yardäm itmiäçäk, dip sanıy. Rezolüsiäne täqdim itkän Alijir – Berläşkän Millätlär Oyışması dönyağa yalğış kündermä cibärde, dide. Rusiä, İminlek Şurasınıñ berdäm fikerdä bulmawı – qızğanıç, dip belderde. 15 äğzalek İminlek Şurasınıñ 11 äğzase resolüsiäne xuplap tawış birde, 3se – tawış birüdän totılıp qaldı. Amerika Quşma Ştatları – qarşı çıqtı. Bu xaqta tulıraq mäğlümat berniçä minuttan Azatlıq dulqınnarında bulaçaq. Bügen Könbatış Yarda İsrael ğaskärläreneñ tikşerü noqtası yanınnan uzıp barğanda maşina şartlap ber fälestinle hälak buldı. Şaxitlär süzlärenä qarağanda, bu keşe – Al Aqsa intixarçıları brigadasınıñ äğzase bulğan. Fälestin çığanaqları xäbär itüençä, maşina şartlatqıçlar tulı bulğan. Hamasnıñ ruxi yulbaşçısı şeix Äxmäd Yassin üterelgännän soñ Al Aqsa suğışçıları İsraeldän monıñ öçen üç alaçaqların belderde. Hamas belderüençä bügen anıñ ike äğzase Gaza sızığındağı yähüd awılına diñgezdän ütep kerergä tırışqan bulğan. Alarnıñ ikesen dä İsrael xärbi köçläre atıp ütergän.

XS
SM
MD
LG