Accessibility links

шимбә, 3 декабрь 2016, Казан вакыты 22:53

Acarstan säysätçelärenä höcüm äzerlägän killer qulğa alındı


Gruziä räsmiläre bügen Acarstan avtonomiäse başlığınıñ ike köndäşen üterergä cıyınğan ber keşe qulğa alındı, dip xäbär itte. Gruziäneñ milli iminlek ministrı Gigi Ugulava süzlärenä qarğanda killernıñ Acarstan İminlek ministrı Soso Gogi-tidze belän elemtädä toruı şiklänelä. Şulay uq Ugulava äytüençä, qulğa alınğan bu keşe ike ay elek acar räsmie Temur İnaişvili'ğa höcüm itüdä şiklänelä. İnaişvili, Gruziä prezidentı Eduard Şevardnadze xakimiättän çitlätelgäç Acarstanda iğlan itelgän ğadättäntış wazğiätne idarä itüçe ide, anıñ mäyete ike ay elek Batumi'da tabıldı. Gruziä yäkşämbe könne parlament saylawların ütkärergä äzerlänä, Tbilisi belän Batumi arasında kierenkelek bik saqlana. Gruziä prokuraturası elekke mäğärif ministrı Alexandr Kartoziya häm anıñ finans mäs'älälärdäge yardämçese Vladimir Sanadze'ğa, däresleklär bastıruğa bülengän aqçalarnı üz maqsatlarında qullanuda ğayepläw belderde. Alar qulğa alınmağan. Yaña prezident Mixail Saakaşvili ilbaşı bulıp saylanğaç – korrupsiägä qarşı köräş alıp baraçağın belderde. Gruziä xökümäteneñ Gruziäneñ sovet çorınnan soñğı berençe prezidentı Zviad Gamsaxurdiäneñ 65 yäşlege uñayınnan uzdırılaçaq mädäni häm dini çaralarğa aqça biräçäge mäğlüm buldı. Bu çaralar irtägä başlanıp 6 ay däwam itäçäk. 1939nçı yılnıñ 31nçe martında tuğan Ziad Gamsaxudriä Gruziä prezidentı bulğaç ta berniçä ay uzğaç kitergä mäcbür bulğan ide. 1993nçe yılda ul Çeçnyada ülde. Anıñ niçek ülgäne turında tögäl mäğlümat äle dä xäbär itelmi. Gamsaxurdiä Çeçnyada cirlängän, prezident Mixail Saakaşvili anıñ tabutın Gruziägä alıp qaytıp cirläw mömkinlege turında belderde.

XS
SM
MD
LG