Accessibility links

Кайнар хәбәр

Gruziä oppozitsiäse bu yulı da parlament saylawlarınıñ xärämläşülär belän uzuın belderä


Gruziädä yäkşämbe könne ütkän parlament saylawlarınıñ berençe näticälärennän kürengänçä, ilneñ yaña prezidentı Mixail Saakaşvili citäklägän Milli xäräkät partiäse parlamentta xälitkeç küpçelekkä iä bulaçaq. Ä menä oppozitsiädäge partiälär isä xakimiatne üzlärenä birelgän tawışlarnı urlawda ğäyepli. Saakaşvili üze saylawlar tärtiple genä uzdı, waq-töyäk problemalar Acarstanda ğına buldı dip belderä.

Gruziäneñ Üzäk saylaw komissiäse belderüenä qarağanda, prezident Mixail Saakaşvili citäklägän Milli xäräkät partiäse parlamenttağı bar diärlek urınnarnı yawlıy ala. Tawışlarnıñ yaqınça unnan ber öleşe sanalğan çaqta Saakaşvili partiäsen yaqlaw 76 protsent tiräsendä ide. Saylawlarda qatnaşuçı tağın 15 partiä arasınnan parlamentta Eşmäkärlär Berlege häm Yaña xoquqlar partiäse tözegän berektäşlek kenä bulırğa oşap tora, qalğannarı qanun taläp itkän 7 protsentlıq kirtäne uza almas kebek. Şuşı saylawlar iğtibarnı şunıñ belän cälep itä - bu yulı anda parlament tulısınça saylanmıy. Bıltır noyäbrdä bulğan waqiğälärdän soñ, ä alar elekke prezident Eduard Şevardnadzene xakimiattän çitlätügä kitergän ide, Gruziäneñ Yuğarı mäxkämäse zur şawşu quptarğan häm xalıqnı uramnarğa çığarğan elekke saylaw näticälären öleşçä genä, partiä isemlekläre belän saylanğan öleşen köçtän çığarırğa buldı. Ul waqıttağı oppozitsiä Şevardnadzene näq menä şul saylaw näticälären üzenä niçek kiräk şulay bozuda ğäyeplägän ide. Xakimiat üzgärgännän soñ da yaña parlament saylawların öleşçä genä ütkärü xaqında qarar çığarıldı. Xäzer inde xärämläşüdä, berniçä ay elek Eduard Şevardnadzene näq şunıñ öçen ğäyeplägän Mixail Saakaşvili üze ğäyeplänä. Sulçı Xezmät partiäse, misal öçen, tawışlarnıñ kimendä 30 protsentın qazanuın belderä, ä saylaw komissiäse isä, älege partiäne yaqlaw barı tik 5 yarım protsent tiräsendä genä di. Xezmät partiäse wäkile Gela Daniela, älege saylawlar 2-nçe noyäbrdägese tösle ük xärämläşülär belän uzdı, bu ildä asılda berni dä üzgärmäde" digän belderü belän çıqtı. Üzäk saylaw komissiäse räise Zurab Çiaberaşvili isä, tawış birü normal'' uzdı, bez saylaw näticälärenä zur yoğıntı yasarlıq bernindi dä qanun bozu oçraqların terkämädek" dip belderä.

Audio, Zurab Çiaberaşvili

Prezident Saakaşvili dä xärämläşüdä ğäyepläwlärne kire qağa häm soñğı tawış birü Gruziädä 10 yıl eşendä ütkän bar saylawlarnıñ iñ ğädele buldı dip isäpli. Anıñ fikerenä qarağanda, oppozitsiä öçen niçek kenä ayanıç bulmasın, näticälär çınbarlıqnı çağıldıra.

Audio, Mixail Saakaşvili

Berük waqıtta ul üzeneñ Acarstandağı säyäsi köndäşe, räsmi Tbilisidäge yaña xakimiatne tanımağan Aslan Abaşidzegä dä qanığıp kitä. Yäğni tawış birüdä qayber kirtälär bulsa da, alar Acarstanda ğına küzätelgän. Monısın Saakaşvili inde inglizçe belderä.

Audio, Mixail Saakaşvili

"Saylawlar, minemçä, irekle häm ğädel uzdı. Älbättä, ni qızğanıç, Acarstan töbägendä qayber tärtipsezleklär buldı-buluın, läkin min, xäzerge wäzğiat elekkelärenä qarağanda küpkä yaxşıraq buldı dip isäplim" di Gruziä prezidentı yäkşämbe uzğan saylawlar xaqında. Ul inde küptännän Acarstanda Tbilisigä kündäm xakimiat urnaştıraçağın wäğdä itä häm parlament saylawlarında ciñü Saakaşvili öçen bu yünäleştä berençe adım bula ala. Acarstandağı tawış birüneñ niçek baruın küzätep toru öçen ul Batumğa xökümät citäkçese Zurab Jvaniäne cibärde häm, Abaşidzeneñ Acarstanda üzäk xökümät xakimiaten tanımawına kiläçäktä yul quymayaçağın belderde.

Kärim Kamal, Praga
XS
SM
MD
LG