Accessibility links

Evropa komissiäseneñ qararı Tatarstan Konstitutsiäsen yaqlap qala almadı




29 mart könne, Tatarstan Yuğarı mäxkämäsendä, Tatarstan Konstitutsiäse östenennän barğan eşne qaraw däwam itelde.



Belgänegezçä, Rusiä baş prokurorı urınbasarı Aleksandr Zvägintsev suverenlıq töşençäsenä bäyle bulğan, Tatarstannıñ tuğrasına, bayrağına, gimnına däğwä belderä. Şulay uq ul, Tatarstan deputatların çaqırtıp alu tärtibe tögälsezlege belän kileşmi häm bu normanı ğämäldän çığarırğa täqdim itä.



Rusiä prokuraturası isemennän eş yörtkän Tatarstan prokurorı Kafil Ämirov, mäxkämä utırışında çığış yasap, üz qaraşın belderde. Anıñ äytüençä, Rusiä konstitutsiäsendä, Rusiäneñ küpmillätle xalqı ğına suverenitet iäse bula ala, dielgän, şuña, respublikalar möstäqil bula almıy. Ä gerb, gimn häm bayraq, respublikalarnıñ däwlätçelek bilgeläre tügel, ä federatsiä subyektınıñ üz üzen tanıtu bilgese genä, dip sanıy Kafil Ämirov.



Tatarstan yağınnan mäxkämä utırışında Midxät Kormanov qatnaştı. Ul mäxkämäneñ 2003 yılda. şuşı uq mäs’älädä çığarğan qararın iskä alıp, konstitutsiäne tikşerü eşen tuqtatırğa çaqırdı. Annarı ul, Çeçnyanıñ töp qanunın tikşergän Venetsiä komissiäseneñ qararların mäxkämägä täqdim itärgä telägän. Ämma, xökemdar Radik Ğabdullin, älege Evropa komissiäseneñ urısçağa tärcemä itelgän qararı xoquqlı bula alamı, dip şiklänep, älege dokumentnı eşkä cälep itärgä telämäde.



Xökemdar ike yaqnı da tıñlap, utırışnıñ eşendä tänäfes iğlan itte. Utırış 31 martta däwam iteläçäk.



Bikä Timerova.

XS
SM
MD
LG