Accessibility links

сишәмбе, 6 декабрь 2016, Казан вакыты 22:59

Qazan tağın 15 yıl üsäçäk äle


Qazan şähäre xalıq deputatları şurasınıñ 19 sessiäseneñ ikençe utırışı tonıq qına başlanıp kitte. Räis Kamil'' İsxaqov deputatlarnıñ könnän kön azaya baruına zarlanıp aldı. Kvorum öçen 84 deputat kiräk ikän, ä zalda 89 deputat. Saylawlardan soñ şaqtıy ğına keşelär Däwlät Şurasına küçkän. Kön tärtiben tikşergändä ber deputatnıñ Qazanda xristian mäktäbe açu täqdime dä utırışnı canlandırıp cibärä almadı. Kamil'' İsxaqovnıñ söyläw tonı mondıy cäncallı mäs''älälär kertergä mataşularğa bernindi di ömet qaldırmadı. Artıq därtlänergä säbäplär yuq şul. Qazan şähäre xalıq deputatları şurası sessiäseneñ 25 martta uzğan berençe utırışında Mintimer Şäymiev qatnaştı. Şura räise Kamil'' İsxaqovnıñ şähär administratsiäseneñ uzğan yılda başqarılğan eşlär turındağı xisabın kisken tänqitläde. Äye Qazan tuzğan toraq programmasın tormışqa aşıruğa zur öleş kertte. Qazannıñ 1000 yıllığına äzerlek öçen zur eşlär başqarılğan. Läkin şul “cäyelderelgän eşlärne” cıyıp alırlıq tügel. Prezident fikerençä böten şähär totaş ber tözeleş mäydanına äyländerelde. Äye Qazannıñ meñ yıllığı xalıq bäyräme bulırğa tieş. Läkin Qazan çüptän arındırıluı, uramnar, işek alları, yortlarğa kerü urınnarı çistalığı yağınnan respublikanıñ häm Rusiäneñ Mäskäwdän başqa şähärlärennän närsäse belän ayırılıp tora? Qazanda yullar häm trotuarlar yaxşıraqmı? Yuq. Toraq-kommunal'' xucalıq xezmäte öçen tüläwlär arzanraqmı? Yuq. Transport yaxşıraq eşlime? Yuq. Mäktäplär häm xastäxanälär torışı başqa şähärlärgä qarağanda yaxşıraqmı? Yuq. Prezident tarafınnan Qazan şähäre administratsiäse häm şurası uzğan yıldağı eşçänlegenä menä şundıy bäya aldı. Şuña kürä sessiäneñ 31 marttagı däwamı citdi häm eşlekle şartlarda ütte. Deputatlar “2004-2008 yıllarğa Qazan xalqına transport xezmäten yaxşırtu” “2004-2010 yıllarğa su belän tä''min itüne yaxşırtu” programmaların qabul ittelär, “2015 yılğa xätle Qazannıñ strategik üseşe” turındağı şähär şurası qararınıñ ütäleşen tikşerdelär. Älbättä bolar prezident tänqitennän soñ aşığıç uylap çığarılğan programmalar tügel. Bu küptän uylanılğan, äzerlänep quyılğan programmalar. “Qazannı su belän tä''min itüne yaxşırtu” programmasında 2010 yılğa şähärdäge xalıq sanı isäp öçen 1089000 dip alınğan bulğan. Bu 2002 yılnıñ 1 ğinwarına turı kilgän san. Küräsen soñğı mizgeldä genä çinovniklar iskä kilep quldan ğına bu sannı 1240000 dip tözätep quyğannar. Qazanda soñğı xalıq sanın alu näticälärençä 1 million 105 meñ 306 keşe yäşi.

Yunıs Ätnäle.

XS
SM
MD
LG