Accessibility links

сишәмбе, 6 декабрь 2016, Казан вакыты 08:55

Acarstan partiäse Gruziäneñ yaña parlamentına ütä almadı - Batumi moña cawap çaraları ezli


Gruziädä uzğan yäkşämbedä parlamentqa ütkän östämä saylawlar näticälärennän kürengänçä, soñğı yıllarda berençe märtäbä anda Acarstannıñ wäkilläre bulmayaçaq. Bu isä räsmi Tbilisi xakimiaten tanımağan şuşı respublikada zur qänäğätsezlek xise uyata, Acarstan citäkçese Aslan Abaşidze tarafdarları qarşılıq çaraları ütkärü belän yanıy.

Elekke prezident Şevardnadze xakimiattän çitläşterelep, anıñ urınına xäzerge citäkçe Mixail Saakaşvili kilgännän birle Aslan Abaşidzeneñ Tbilisidäge üzäk xökümät belän araları şaqtıy kierenkelängän ide. Eş şuña da barıp citte ki, Abaşidze tarafdarları Gruziäneñ zur küpçelek belän saylanğan yaña prezidentın çik buyında tuqtatıp anı Acarstanğa ğomumän kertmäde. Mixail Saakaşvili isä üz yağınnan, Batumine üzäk gruzin xakimiaten tanuğa künderäçägen wäğdä itte. Utkän yäkşämbedä Gruziä parlamentına uzğan östämä saylawlarnıñ näticäläre menä şul wäzğiat sürätendä iğlan itelde. Aslan Abaşidze öçen näticälär küñelle tügel - soñğı yıllarda berençe märtäbä Acarstannıñ gruzin parlamentında, ayırım saylanğan 6 deputatnı iskä almağanda, oyışqan wäkillege bulmayaçaq. Üzäk saylaw komissiäseneñ räsmi näticälärne iğlan itkän belderüendä, Abaşidzeneñ Demokratik yañarış berlege saylawlarda tawışlarnıñ 6-lap qına protsentın qazanğan dielä, bu isä aña parlamentqa üz wäkillären ütkärü öçen citärlek tügel, yaqlaw kimendä 7 protsent bulırğa tieş. Partiä isemleklärennän Gruziä parlamentına ğomumän ike partiä genä uza bulıp çığa, berençese - Saakaşvilineñ "Milli xäräkät demokratları", ul anda xälitkeç küpçelekkä iä bulaçaq, ä ikençese - yaña uñçılar häm eşmäkärlär berektäşlege. Qalğan partiälär, şul isäptän Abaşidzeneñ "Yañarış" berlege dä 7 protsentlıq kirtäne ütä almağan. Acar citäkçese, tawışlarnı sanaw bar il buylap xärämläşülär belän alıp barıldı dip isäpli häm üzeneñ xalıq tarafınnan yaqlanuın isbatlaw maqsatında üze citäklägän töbäktä maxsus referendum ütkärergä teläwen belderä. Çärşämbedä Acarstan televideniäse aşa yasağan çığışında Aslan Abaşidze "şuşı referendum 28-nçe mart saylawlarında Acarstan xalqınıñ çınlıqta kemne yaqlawın kürsätügä yardäm itäçäk" dip belderde. Tbilisidäge yustitsiä ministrlığı Abaşidzeneñ şuşı niäten "konstitutsiägä qarşı ğämäl" bularaq bäyälärgä cıyınuın äytte. Saakaşvili xakimiate Acarstan häm bigräk tä anıñ citäkçese üzsüzlegenä oyışqan töstä qarşı torırğa cıyına. İnde saylawlarğa äzerlek tä 1991-nçe yıldan soñ berençe märtäbä Abaşidzegä qarşı köräş alıp barğan oppozitsiä qatnaşında alıp barıldı. "Yaña Acarstan" dip atalğan şul xäräkät açıqtan-açıq Tbilisi tarafınnan yaqlana, anıñ citäkçese Tamaz Diasamidze, saylaw näticäläre Abaşidze xakimiateneñ azağın añlata dip isäpli.

Audio, Tamaz Diasamidze

"Bu böyek ciñü, soñğı 12 yılda berençe märtäbä acar oppozitsiäse demokratik häm irekle saylawlar aşa iñ qüwätle räsmi partiälärneñ bersen tar-mar itte" di Abaşidzegä qarşı çıqqan oppozitsiä citäkçese Diasamidze. Anıñ köräştäşe Eduard Surmanidze ğomumän, Gruziä parlamentına ütkän saylawlar näticälären iskä alıp Acarstandağı xakimiatne üzgärtügä öndi häm bu töbäktä dä yaña saylawlar uzarğa tieş dip belderä. Abaşidze häm ul citäklägän Acarstan parlamentınıñ wäkalätläre 2006-nçı yılda ğına tämamlana. Ul arada acar citäkçeseneñ tarafdarları üzläreneñ xaq buluın raslaw maqsatında Tbilisigä marş oyıştırırğa cıyına.

Kärim Kamal, Praga
XS
SM
MD
LG