Accessibility links

шимбә, 10 декабрь 2016, Казан вакыты 15:56

Udmurtiädä tatar yäşläre berlege yañadan eşen başladı


Udmurtiädä tatar yäşläre berläşep eşli başlawına ağımdağı yılnıñ közendä 10 yıl tula. Bu däwerdä Berlekneñ bik aktiv eşlägän yılları da buldı, inde yäşlek uçağı sünep kitkän mizgellärne kiçerde. Ütkän yılda, mäsälän, qorıltayda «İman» berlegeneñ yaña räise saylanğan ide. Şurağa da bik küp yaña äğzalar kertelsä dä, ğomumän, qorıltaydan soñ alarnıñ eşläre turında mäğlümatnı işetergä turı kilmäde. Oyışma inde yuqqa çığu çigenä kilep citkäç, anı saqlap qalu niäte belän universitetnıñ tatar tele bülege studentkası Zöhrä Kasimova häm tağın berniçä qız yäşlär arasında eşne başlap cibärde. Alar uq 27 martta «İman» tatar yäşlärneñ qorıltayın da äzerläp uzdırdı. Cıyılğan xalıq aldında yasağan çığışında Zöhrä Kasimova bu berniçä ayda ğına başqarılğan eşläre turında xisap tottı. Anıñ çığışınıñ ber öleşen sezneñ iğtibarığızğa da täqdim itäbez.

—audio—

Qızlar seminarda da bulıp, anda yäşlär arasında eşne oyıştıru alımnarın üzläştergän, «tügäräk östäl» söyläşüe uzdırğan, başqa millät oyışmaları belän dä berniçä çarada qatnaşqan. Qazanda da bulıp qaytqannar. Qorıltaydağı çığışlardan, qabul itelgän qararlarğa qarağanda oyışmağa yuğarı uqu yortlarında uquçı tatar yäşlären cälep ity öçen küp kenä eşlär başqarırğa niätläre. İjawdağı oyışmağa Mojğa, Alnaş, Glazov, Yukamen, Balezino, Kiäsovo, Kizner rayonnarınnan da yäşlärne tuplarğa telilär. Qorıltayda älege rayonnardan qatnaşqan yegetlär, qızlar üzläreneñ töbäkläre belän tanıştırıp, kem yärdäm soradı, kem inde ütkärgän çaraları xaqında citkerde. Mojgalıylar yäş yegetlär öçen milli köräş seksiäsen oyıştıru belän mäşgul', Kiznerda cırçılar küp, ansambl' buldırırğa niätlilär, Alnaştan kilüçelär yäşlär oyışmasına äle genä kilep quşılğannar, üzläre dä mädäniät yortında eşlilär, şuña bu ölkädä kübräk çaralar planlaştıralar. Qorıltayğa kilgän ölkännär - Udmurtiä tatar ictimaği üzäge wäkilläre dä, respublikanıñ yäşlär eşe buyınça däwlät komitetı da yäşlärneñ här başlanğıçın xupladı häm yärdäm itärgä dä ışandırdı. Yäşlärneñ qorıltaydan soñ tuğan fikerläre belän tanışıyq äle.

—audio—

Şulay itep pısqıp torğan uçaq dörläp yanıp kitte. Anı sündermäs öçen yegetlärneñ—qızlarnıñ därte citärme, monı waqıt kürsäter.

Xämidä Ğayfullina, «Azatlıq» radiosı, Udmurtiä.

XS
SM
MD
LG