Accessibility links

пәнҗешәмбе, 8 декабрь 2016, Казан вакыты 07:10

Sverdlov ölkäse awıllarında uqımışlı imamnar citeşmi


Küptän tügel Sverdlov ölkäse möselmannarınıñ Qazıylat idäräse citäkçeläre Perm mäçeteneñ yöz yıllıq yubileena bağışlanğan tantanada qatnaşıp qayttılar. Bu waqiğağa turı kiterep şulay uq mäçet yanında tözelgän yaña binada mädräsä açu tantanası da bulıp uzğan. Dini belem alu märkäze açılu Ural töbägendä yäşäwçe barlıq möselmannar öçen dä bik quanıçlı xäl.

Soñğı yıllarda kiñ qolaç alğan dini yañarış näticäsendä möselmannar yäşägän bik küp şähär häm awıllarda bersennän-berse kürkäm mäçetlär üsep çıqtı. Sverdlov ölkäsendä dä alarnıñ sanı, şöker, küp. Şähär cirlärendä urnaşqan mäçetlär matur ğına eşläp kilälär. Ä menä tatar awıllarında tözelgän mäçetlärneñ xäle törleçä. Qayber awıllarda mäçet işeklärenä elep quyğan yozaqlar qayıt bäyrämnärendä genä açıla. Bu xälneñ iñ töp säbäbe – xalıq belän eşlärlek uqımışlı imamnar yuqlığı. Ser tügel, küp kenä awıllarda imam rolen dinne olığayğaç qına tota başlağan şul uq awıl qartları başqara. Çın küñellärennän alıp barğan eşlären xoday täğälä qabul itsen, bilgele. Ämma qayber oçraqlarda alarnıñ, äytik, märxümnärne soñğı yulğa ozatu kebek bik çeterekle yolalarnı döres itep tügel, ä bälki keşedän işetep kenä belgänçä başqaruları mäğlüm.

Ğomumän, dini kadrlar citmäwe zur problemalarnıñ bersenä äwerelep bara. Soñğı yıllarda ruxi belem alu yortların tämamlawçı uqımışlı yäşlär imam wazifasın ütäw yulın tügel, biznes yulın saylıylar. Bu eştä alarğa könçığış tellären yaxşı öyränüläre yärdäm itä.

Sverdlov ölkäse möselmannarınıñ Qazıylat idäräse mäçetlärne uqımışlı imamnar belän tä'min itü yulın ezli. Perm şähärendä Uralnıñ dini märkäze bulıp torırlıq yaña zur mädräsä açıluı dini kadrlar äzerläw mä’säläsen çişär digän ışanıç tudıra. Qazıylat idäräse citäkçese Danis xäzrät Däwlätov äytüençä, Ural töbägendä mondıy zur mädräsälärneñ bulğanı yuq ide. Danis xäzrät bu mädräsäneñ töbäktä islam dinen üsterüdä iñ uñay alşart bulaçağına ışanıçın belderde.

Fäwiä Safiullina. Yekaterinburg.

XS
SM
MD
LG