Accessibility links

Кайнар хәбәр

Bötendönya oyışmasınıñ üzäge Qazanda


1-3nce aprel'dä Qazanda Rusiä territoriäsendä “Berläşkän şähärlär häm cirle xakimiätlär” Bötendönya oyışmasınıñ töbäk bülegen oyıştıru Sessiäse ütä. Böten dönyadağı cirle xakimiätlär arasında täcribä urtaqlaşu, cirle üzidarä qimmätlären saqlaw öçen oyıştırılğan älege oyışmağa Berläşkän şähärlärneñ Bötendönya Federatsiäse häm cirle xakimiätlärneñ Xalıqara Berlege berläşä. Bu ike zur oyışmanıñ berläşü protsessı 1998nce yılınnan birle bara inde.
Rusiäneñ munitsipal' berläşmälär Kongressı Qazan şähäre xakimiäte yärdämendä uzdırıla torğan şuşı sessiä 2nce aprel'dä “Qazan” milli-mädäni üzägendä ütte. Anda älege oyışmanıñ General' sekretare Elizabet Gato, Rusiäneñ Munitsipal' berläşmälär Kongressı Räise Oleg Sısuev, Qazan şähäre xakimiäte başlığı Qamil İsxaqov, Rusiä şähärläreneñ xakimiät başlıqları, şulay uq Rusiäneñ munitsipal' berläşmäläre citäkçeläre Ärmänstan, Qırğızstan wäkilläre qatnaştı. Şulay itep älege çara 117 keşe qatnaşlığında ütä.
Rusiäneñ Munitsipal' berläşmälär Kongressı Räise Oleg Sısuev sessiäne açıp cibärep, älege çaranıñ näq Qazanda uzuın Qazannıñ säwdä yulları, xalıqlar yazmışları, mädäniätläre kiseşkän urında urnaşuı belän bäyli.
Yevroaziat regional' bülege prezidentı itep saylanğan Qazannıñ şähär başlığı Kamil' İsxaqov, yaña oyışmanıñ eşçänlege öçen barlıq şartlar, zur täcribä tuplanğanı häm başqala üzennän zur öleş kertäçäge turında belderde. Mari-El' respublikasınıñ başqalası Yoşqar Ola şähäre xakimiäte başlığı Vladimir Tarkov yaña oyışma yärdämendä törle illärne berläştergän berük iqtisat, cämäğät, mädäniät problemaların dön'yaküläm xäl itü mömkinlege tuuı turında söyläde.
Sessiädä qaralğan mäsälälär arasında Rusiä häm BDB illäre buyınça Yevroaziat regional' bülegen oyıştıru, töbäk bülekneñ ustavın qabul itü, bülekneñ Şurasın, Prezidentın, General' sekretaren saylaw kebek mäsälälär qaraldı. Yaña oyışmanıñ ştab-fatirı itep Qazannıñ Ostrovskiy uramında urnaşqan “Xalıqlar duslığı yortı” 3 yıl waqıt däwamında xezmät itäçäk.
Şuşı yılnıñ 2-5nce may könnärendä Parijda “Berläşkän şähärlär häm cirle xakimiätlär” oyışmasınıñ oyıştıru kongressı uzaçaq. Anda cir şarındağı barlıq illärdän 3000 wäkil qatnaşır. Kongressta yaña oyışmanıñ säyäsi yunäleşen, oyışma şurasın häm byurosın saylarğa tieşlär. Ä xäzergä şunısın äytep bula munitsipal' xakimiätlärneñ Bötendönya oyışmasınıñ Rusiä häm elekke SSSR illäre buyınça töbäk bülekçäse tözelde. Häm bu bülekçäneñ üzäge Qazanda urnaşaçaq.
Al'bina Zäynulla, Qazan.
XS
SM
MD
LG