Accessibility links

җомга, 9 декабрь 2016, Казан вакыты 22:14

NATO 7 yaña äğzane qabul itte


Bügen NATO Brüssseldä üzenä yaña 7 äğza ilne qabul itüen bilgeläde. Bolğarstan, Estoniä, Latviä, Litva, Rumıniä, Slovakiä häm Sloveniä bayraqları kütärelgäç här ilneñ gimnı yañğradı. NATO general sekretare Jaap de Hoop Scheffer, tağın yaña äğzalärgä dä berektäşlekneñ işege açıq, dip belderde. Latviä tışqı eşlär ministrı Rihards Piks NATOğa kerü – "xiyalnı tormışqa aşıru buldı", dide. Slovakiä tışqı säyäsäte başlığı Eduard Kukan isä bu çaranı – "zur tarixi waqiğa" dip atadı. NATO general-sekretare şulay uq NATO-Rusiä oçraşuına kilgän Rusiäneñ tışqı eşlär ministrı Sergei Lavrov'nı sälamläde, Rusiä belän xezmättäşlekne elekkegeçä däwam itergä cıyınğanın belderde. Şunda uq çığış yasağanda NATO general sekretare Jaap de Hoop Scheffer, Tönyaq Alyans suğış cinäyätlärendä ğayeplänüçelär, şul sanda Bosniä serb citäkçese Radovan Karadziç'nı ezläwne däwam itäçäk, dip belderde: "Küpmeder waqıt alar bälki qaçıp ta tora aladır, ämma alar ber qaya kitep tä qotıla almayaçaq. Häm min, älbättä bu operatsiäneñ uñışlı buluın telär idem, cinäyät qıluda şiklänüçelärneñ qulğa alınuı öçen här keşeneñ närsä dä bulsa eşläwen telär idem, çönki minem fikeremçä, alarnıñ Hague'tağı xalıqara tribunalğa tapşırıluı – böten töbäk öçen möhim" dide NATO başlığı. NATO köçläreneñ Karadziçnı Bosniä-Herzogovinada ezläw çarası uñışsız tämamlandı. Elekke Bosniä Serbları yulbaşçısı Radovan Karadziç häm general Radko Mladiç'qa Bosniä suğışı waqıtında möselmannarğa qarşı genosid oyıştıruda, şulay uq suğış cinäyätläre häm keşeçelekkä qarşı cinäyätlär qıluda ğayepläw belderelgän. NATOnıñ kiñäyüe cıyınında bügen Rumıniä tışqı eşlär ministrı Mirçea Geoana Moldova mäs'äläsen dä kütärde. Matbuğat oçraşuında Geoana Dnestr buyı töbäge– Rumıniä häm NATO'da borçılu uyata, dide: "NATOnıñ kiñäyüe häm Rumıniäneñ berektäşlekkä kerüe – Moldova respublikasınıñ kiläçägenä yaxşı tä'sir yasar dip ışanam, Dnestr buyı nizağın çişü – Rumıniä häm xäzer inde NATO köntärtibendä torğan ber mäs'älä," dide Mircea Geoanna, Rumıniäneñ tışqı eşlär ministrı. Rus telle Dnestr buyı töbäge Moldovadan 1990nçı yılda ayırılıp çıqtı. Töbäktä äle dä meñ yarımğa yaqın Rusiä xärbie bar.

XS
SM
MD
LG