Accessibility links

сишәмбе, 6 декабрь 2016, Казан вакыты 08:50

Ğiraqta xättä iminlek saqlawçılar üzläre dä imin tügel


Çärşämbedä Falluca şähärendä 4 çit il keşeseneñ waxşilärçä üterelüe Ğiraqqa kileşü nigezendä eşkä kilüçelärgä nindi qurqınıç yanawın tağın ber kürsätte. Älegä Ğiraqta xättä iminlek saqlawçılar üzläre dä imin tügel.

Bügenge Ğiraqta iminlek saqlaw käsebe iñ zur häm üseş kiçergän käseplärneñ berse bulıp tora, xörmätle tıñlawçılar. Tözeleş, binalar, keşelär – bolarnıñ hämmäsen saqlarğa kiräk. Şuşı xezmätne 180-gä yaqın kompaniä kürsätä, nigezdä çit il şirkätläre, kübese Britaniädän. Alarda kileşü nigezendä meñlägän keşe eşli. Yallanıp, eşkä kilüçelär, läkin käsepläre qurqınıç.

Çärşämbedä Falluca şähärenä şundıy ber Amerikan şirkätendä eşlägän 4 keşe üterelde. Alarnı başta atqannar, maşinalarında kileş üt törkännär, citmäsä mäshärälängän mäyetlären uram buylap süräp yörgännär.

Christopher Beese ArmorGroup digän şirkät wäkile. Bu şirkät 30- lap ildä iminlek xezmäte kürsätä. Başqa illär belän çağıştırğanda Ğiraqta eşläw şartları beraz başqa, di ul:

Audio (Christopher Beese)

"Ğiraqta bezneñ xezmätkärlär nigezdä civil eşçelärne ozatıp yöri. Ğiraq şartlarına kürä alar qorallanğan bulırğa tieş, läkin bu xöcümnän saqlanu kiräk bulğan öçen minimal qoral."

Şuşı iminlek xezmätläre Ğiraqqa tözekländerü eşlärenä kilgän eşçelärne, qayda ğına barsalar da, ozatıp saqlap yöri. Bu xärbi tügel, civil xezmät, häm dä şaqtıy yaxşı tülängän xezmät sanala. Ämmä, bu xezmätlärgä tänqit belderüçelär dä bar. Londonda urnaşqan konfliktlar çişü belän şöğellänüçe İnternational Alert oyışması wäkile Michael Page:

Audio (Michael Page)

"Bezgä bu xezmätlärgä qarata qaraşnı üzgärtergä kiräk. Yağni, awır qoral belän eş itmäsälär dä, alar xärbi xezmät kürsätüçe bularaq tanılırğa tieş, Yevropa Berlegendä şikelle."

Qayberäwlär, bu şäxsi iminlek xezmäte şirkätläreneñ xärbilär başqarası eşne eşläwenä täniqt belderä. Alarnıñ cawaplılığı da başqa, şuña kürä bu şäxsi kompaniälärne kontrol itü awır. David Claridge Londonda urnaşqan Janusian isemle şundıy ber şirkät citäkçese. Fallucada bulğan xällärdän soñ, Ğiraqqa eşkä barırğa teläwçelär sanı kimergä mömkin di ul:

Audio (David Claridge)

"Bu xäl uñayınnan bez älbättä borçılu belderäbez, häm monnan nindi sabaqlar alınır, iğtibar belän küzätep baraçaqbız."

David Claridge süzlärençä, Ğiraqtağı koalitsiä İdaräse xäzer bu mäsälälärne centekläp tikşerergä, tärtipkä salırğa cıyına.

Ali Gilmi, Praga
XS
SM
MD
LG