Accessibility links

шимбә, 3 декабрь 2016, Казан вакыты 05:34

Başqortstan milisísın tağın tikşerälär


Rusiä Eçke eşlär ministerı Räşit Nurğäliev Başqortstan Eçke eşlär ministerlığı eşçänlegen tikşerergä kürsätmä birgän. Bu xäbärne Rusiäneñ qayber kiñ mäğlümat çaraları tarattı. Küp tıñlawçılarıbız xäterlider äle, uzğan yılda da Rusiäneñ törle xoquq saqlaw oyışmaları Başqortstan Eçke eşlär ministerlığı eşçänlegen tikşerü öçen Ufağa ällä küpme eşçe törkemnär cibärgän ide. Ul çaqta Başqortstan eçke eşlär ministerı Mäskäw tikşerüçelären tırnaq astınnan ker ezlärgä tırışuda ğäyepläde häm matbuğatta küp kenä aqlanular belän çığış yasadı. Yänäse, bu tikşerülär şäxsän aña qarşı yünältelgän häm Diwayıvnı urınınnan alıp, Mäskäw oliğärxları Başqortsatn eçke eşlär ministerı itep üz keşelären quyarğa teli ikän. Niçek kenä bulmasın, federal tikşerüçelär Başqortstan milisísı eşçänlegendä bixisäp xilaflıqlar taptı. Şul çorda cämäğätçelek arasında eçke eşlär ministerın wazífasınnan alaçaqlar ikän digän imeş – mimeşlär eş yörde. Läkin Rafael Diwayıv üz urınında qaldı häm bügenge köndä dä şuşı yuğarı wazífada ul. Bıltırğı tişerülärdän soñ ministerlıqnıñ berniçä zur däräcäle milisíonerın, şul isäptän Diwayıvnıñ berençe urınbasarı Niqolay Patrikeyevnı ğına eşennän buşattılar. Häm menä Başqortstanğa Mäskäwdän yänä rewizorlar kilä. Alar Başqortstannan republík milisísı isemenä yazılğan bik küp şíkyätlärne tikşeräçäk. Soñğı yartı yıl eçendä genä dä Başqortstanda milisí xezmätkärläre tarafınnan ällä küpme qanun bozularğa yul quyılğan. Soñğı waqıtta milisíonerlarnıñ keşelärne üterü oçraqları da bermä ber arttı. Milisíonerlar tege yäki bu cinayättä şiklänelgän keşelärdän soraw alu waqıtında alarnı milisí bülegendä ük yırtqıçlarça üterü oçraqları da bar. Alay ğınamı, xätta xoquq saqlaw oyışmaları xezmätkärläre häm citäkçeläre üzläre arasındağı kisken mönäsäbätlärne utlı qoral yärdämendä açıqlawğa qädär barıp citä. Mäsälän, berniçä ay elek kenä Sibay şähäre prokurorı Qaraçurín äfändene atıp ütergännär ide. Xäzer anı üterüne oyıştıruda şiklänelep Sibay şähäre eçke eşlär idaräsendäge ber bülekneñ başlığı Şahiev qulğa alındı. Başqortstan prokuraturı mäğlümatlarına qarağanda, bıltır republíktağı milisí xezmätkärlärenä qarşı 124 cinayät eşe quzğatılğan, şularnıñ 58 e bügenge köndä mäxkämä oyışmalarına tapşırılğan da inde. Mäskäwneñ çirattağı tikşerüe Başqortstan milisísı citäkçelegendä küp üzgäreşlär kiterüe ixtimal dilär. Moña yaña Rusiäneñ yaña eçke eşlär ministerı Räşit Nurğälievnıñ üz eşen azağına citkerergä yaratuı belän bäyläp añlatalar.

Fänis Fätxi, Ufa.

XS
SM
MD
LG