Qırım tatar KVN komandasın, Qazanğa, uyın därte alıp kilgän bulsa kiräk. «4 tatar»nıñ watanı bulğanğa küräme, respublikada bu uyınğa däwlät küläm iğtibar birelgängä küräme, «İdel buyı zonası» uyınnarı Qazanda ütkärelde. Anda şulay uq, Rusiä ölkäläre, Kazaxstan, Ukraina, Tatarstan, Başqortstan häm başqa yaqlardan kilgän şayannar häm tapqırlar qatnaştı. Barlığı -28 komanda. Qırım tatar komandası, 4nçe aprildä uzğan uyında, üz törkemendä berençe urın aldı, finalğa çıqtı.
Aq mäçettän Qazanğa barlığı 10 uyınçı kilde, alar - Qırım däwlät injener-pedagogika universitetı studentları. Studentlarnı häm alarnıñ uqıtuçıların, Däwlätov Rämzi Rafyq ulın, Qazanğa tağın ber säbäp alıp kilgän ikän. 2002 yılnıñ martında, Tatar gumanitar institutı häm Qırım injener häm pedagogika universitetı arasında, xezmättäşlek turında kileşü tözelgän bulğan. Şuşı kileşü nigezendä, Tatar gumanitar institutı uyınçıları Qırımdağı dusları belän KVN uynap alğan. Şul uq, 2002 yılnıñ cäyendä, qırım tatarları, Tatarstandağı dusları belän bergä, Apas häm Yäşel Üzän rayonnarında arxeologik qazu eşlärendä qatnaşqan.
Şunnan soñ, ğalim Al’bert Borhanov citäkçelegendäge gumanitar institut delegatsiäse Qırımğa barıp, andağı tarixi qazılmalarnı qarap qaytqan. Bu yulı Qırım tatarları Qazandağı kollegalarına qunaqqa kilde.
5nçe april könne, qırım tatarların Bötendönya Tatar kongressı wäkilläre qabul itte. 6nçe april’dä alar Milli mädäni üzäktäge «Borınğı Qazan» kürgäzmäsen, S.Säydäşev, Ğ.Tuqay muzeyların qarayaçaq.
Bikä Timerova.
