Accessibility links

дүшәмбе, 5 декабрь 2016, Казан вакыты 17:33

Xalıqara jurnalı xezmättäşlekkä öndi


2nçе aprel' könne “Berläşkän şähärlär häm cirle xakimiätlär” Bötendönya oyışmasınıñ Yevroaziä töbäk bülegen oyıştıru Sessiäse ütkän ide. Anda “Dialog Avrazii” xalıqara jurnalınıñ başqarma redaktorı Näväl Sevindi dä qatnaştı. Ä şimbä könne Näväl xanım Qazanda cämäğätçelek häm jurnalistlar belän oçraştı. Älege oçraşuda ul “Dialog Avrazii” jurnalı häm xalıqara xezmättäşlek turında söyläde.
Oçraşuğa cıyılğan törle milli oyışma wäkilläre, ğalimnär, zur cämäğät eşlekleläre İstanbuldan kilgän möxärrirgä törle sorawlar birep, xalıqara jurnalı turında qızıqlı mäğlümat aldı. Jurnal rus häm törek tellärendä öç ayğa ber tapqır çığa. Bu basma törle din wäkillären ruxi yaqtan yaqınaytu, aralarında cılı elemtälär urnaştıru öçen oyıştırılğan. Törek häm rus tellärendä çığuçı bu berdänber jurnalnı Rossiä häm BDB illärendä 5 meñläp keşe aldıra. Basmanıñ Tatarstandağı wäkil wazifasın radio jurnalist Timur Urazbaxtin üti.
Näväl xanım äytüençä, bu töbäktä yäşägän xalıq bik törle tel, din häm mädäniät belän bäyle. Şuña da xalıqlarnıñ bu üzençälekläre törle bäxäslär tudıra. Bezneñ maqsatıbız şuşı bäxäslärdän biegräk bulğan urtaq tellärne tabu ide. Üz-ara bäyläneştä buluğa da bez äzer. Mäsälän, älegä Ukrainada “Dialog Avrazii” basması törek häm ukrain tellärendä çıqsın öçen älege töbäk belän kileşü tözelde. Şulay itep bu jurnalnıñ tatar telendä dä çığarğa mömkinçelege, älbättä, bar. Sezneñ belän xezmättäşlek itkändä, bu jurnalnıñ küp yaña törläre basıla alır – dip söyläde Näväl xanım.
“21nçе ğasırda dialog, tüzemlelek, kileşep yäşäw töşençäläre zur ähämiätkä iä häm bez bu jurnal aşa ğasırnıñ bu üzençäleklären taratırğa telibez” – dip belderde Näväl xanım. Häm jurnalnıñ iseme “Da” – äye süze - Dialog Avrazii süzläreneñ baş xäreflärennän tora. Yevropa belän Aziäne ber-berse belän aralaşuğa äzer bulıp torırğa häm “Äye” dip äytergä çaqıra älege basmanıñ şiğare. İstanbul häm Qazannı çağıştırıp, Näväl xanım alarnıñ borınğı zamannan möhim mädäniät üzäkläre buluları turında söyläde. Mondıy qimmätlär başqalarğa da uñay yoğıntı yasıy – dide ul. Xalıqlarnı berläşterü rolen ütägän älege basmada ictimaği, mädäni mäs’älälärgä zur iğtibar birelä.
Aldağı sannar - Yevraziädäge konfessiälär, ictimaği oyışmalar arasındağı mönäsäbätlärgä bağışlanaçaq. Şuşı könnärdä “DA” jurnalı tanılğan qırğız yazuçısı Çıñğız Aytmatovnıñ 75 yıllıq yubileena İstanbulda äzerlek alıp bara ikän.
“Dialog Avrazii” jurnalınıñ xezmätkärläre Qazannıñ 1000 yıllığına bağışlanğan maxsus san da bastırırğa cıyınalar.
Al'bina Zäynulla, Qazan.

XS
SM
MD
LG