Accessibility links

Кайнар хәбәр

Tatarstannıñ şayannarı häm tapqırları köräşä


Şayannar häm tapqırlarnıñ Tatarstannıñ Mädäniät ministrlığı häm respublika fänni-metodik üzäge tarafınnan oyıştırılğan bäygeläre 2003 yılda başlanıp kitte. Älege tamaşanıñ şaqtıy qızıq häm faydalı ikänen kürep, oyıştıruçılar anı kiläçäktä dä däwam itärgä buldılar. Xäzer KVN uyınnarı, alarnıñ maqsatları xaqında Azatlıq radiosı tıñlawçılarına şuşı bäygelärneñ başında torğan fänni-metodik üzäkneñ bülek citäkçese Fäniä Xäsänova söyli.

Şayannar häm tapqırlar bäygese ul yäş buınnı aktivlaştıru, aña estetik tärbiä birüdä, sälämät yäşäw räweşen propagandalawda, ana telebezgä mäxäbbät tärbiäläw, milli traditsiälärne, ğöref-ğädätlärne saqlap qaluda zur rol’ uynıy. Annarı soñ bu uyınnarda yäşlär beräm-beräm, ayırım ğına tügel, ä törkemläşep, bergäläşep uynıylar. Bu alarda xezmättäşlek, duslıq xisläre dä tärbiäli. KVNnıñ rus tellese dä bar anıñ, läkin tatar bäygese añardan bik nıq ayırıla. Çönki anıñ maqsatları başqa

Şundıy zur ömetlär bağlağan bäygeneñ soñğı könnärdä genä yarımfinalğa saylap alu uyınnarı uzdı. Balıq Bistäsendä 30 mart könne häm Buada 4 aprel’dä ütkän uyınnarnıñ teması bulıp Xalıq äytsä – xaq äytä digän mäqäl buldı. Temadan kürengänçä, uyınnar xalıq icatına, xalıq aforizmnarına nigezlände. Bulmas dimä, dönya bu, Ällä yalğan, ällä çın..., İrtük torıp tışqa çıqsam..., Beräwgä – yarıq tağaraq, beräwgä – altın balıq dip isemlänğän konkurslarda 8 komanda yarışıp, şularnıñ 4 oktyäber ayında ütäçäk yarımfinal bäygelärenä çığu mömkinlegenä ireşte. Alar Bua, Mendeleev, Quqmara, Balıq Bistäse komandaları. Qalğan 4 komanda yañadan may axırında üzara yarışıp, kiläse bäygelärdä qatnaşırğı mömkinçelek öçen köräşäçäk.

Şuşı ike uyınnı qarağannan soñ, çınnan da tatar telle KVNnıñ kiläçäge ömetle, digän fiker tua. 4 apreldä Bua şähärendä uzğan uyın anı tağın da köçäytte. Çönki, jyuri häm tamaşaçılar fikerençä, monda çığış yasağan komandalar ayıruça uñışlı uynadılar.

Tağın şunısın da äytep kitärgä kiräk. Ällä inde Tatarstanda şayannar häm tapqırlar bik küp bulğanğa, ällä bu uyınnı bezdä ayıruça yaratqanğa, respublikada tatar telle KVN bäygeseneñ xätta ike ligası uynap kilä. Şularnıñ berse – respublikanıñ Mädäniät ministrlığı tarafınnan oyıştırılğan uyınnar. İkençe ligada isä kübräk respublikanıñ Kama aryağı öleşe häm Başqortstan komandaları uynıy. Anda kübräk studentlar qatnaşa. Bu ligada xäzer yarımfinal uyınnarı bara, ä qayber töbäklärdä yarımfinalist komandalar inde bilgelängän dä.

Gölnaz İlgizär

XS
SM
MD
LG